İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 414 Hüküm no: 504 Orijinal metin no: [212-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola’nın Çukadar İbrahim aleyhindeki alacak iddiasında anlaşma sağlanması Hukūk, 180 [guruş] Ma‘rûz, Arzuhâl eden Nikola zimmî Çarşamba günü huzûr-ı âlîde ma‘kūd meclis-i şer‘-i enverde arzuhâlde mezkûr Hasmı Çukadâr İbrahim b. Bekir mahzarında mezbûr İbrahim yetmiş altı senesi Şa‘bânı târîhiyle bir müzevvir temessük peydâ ve Yani imzâsıyla mümzâ olup mezbûre aslâ deynim yoğiken benim sende yüz seksen guruş cihet-i karzdan alacağım vardır deyü bi-gayrı hakkın yüz seksen guruşumu ahz ve istihlâk etmekle taleb ederim deyü da‘vâ, ol dahi cevâbında merkūm Nikola zimmetinde meblağ-ı mezkûr yüz seksen guruş cihet-i karzdan hakkım olmağla Çavuş mübâşeretiyle mezbûru meclis-i şer‘e ihzâr ve şâhideyn ile isbât ve i‘lâm etdirdip bi-hakkın almış idim deyü def‘ edip lâkin def‘-i meşrûhuna bi’l-istimhâl ve’l-imhâl ikāmet-i beyyine edemediğinden mâ‘adâ i‘lâm-ı mezkûru dahi ibrâz edemeyip da‘vâları faysal bulmamış idi. Hâlâ merkūm Nikola ile bâ-vesâtet-i Müslimîn mezbûr Çukadâr İbrahim seksen guruş üzerine sulh olup ve bedel-i sulh olan seksen guruşu târîh-i i‘lâmdan sekiz gün tamâmına dek edâya istîcâl etdikde merkūm Nikola dahi sulhu kabûl ve ziyâde yüz guruşa müte‘allıka âmme-i da‘vâdan mezbûr Çukadâr İbrahim’in zimmetini ibrâ ve iskāt ve ecel-i merkūma râzı oldukda mezbûr İbrahim dahi ibrâ-i kabûl ve müddet-i mezkûr tamâmında bedel-i mezbûru edâya ta‘ahhüd etmekle bu minvâl üzere kat‘-ı nizâ‘ eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Bâkī emr hazret-i veliyyü’l-emrindir. Fî 23 min-Şevvâl sene [1]179.