İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 438 Hüküm no: 536 Orijinal metin no: [226-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gedikpaşa Fırını ekmekçisi Bayram’ın Seddülbahir Kalesi’nde kalebend cezasıyla cezalandırılması Gedikpaşa ekmekçisi kal‘a-bend Ma‘rûz, Altmışbir Cemâ‘at yoldaşlarından Bayram Gedikpaşa fırını ekmekçisi işbu Receb-i şerîf’in dokuzuncu günü paralıkda yirmi beş dirhem noksân ile ahz ve orta çavuş kulları ma‘rifetiyle ta‘zîr ve beş gün hapisden sonra ıtlâk olunduğu gün yine paralıkda on ve onbeş dirhem noksân ile taraf-ı dâ‘îlerinden ahz ve ihzâr ve istintâk olundukda noksân-ı mezkûr şerîkim zimmînin hasâretindendir bundan sonra noksân işlemem ve işletmem deyü ta‘ahhüd etmekle mesfûr zimmî ta‘zîr ve kendi ta‘ahhüdüne binâen tahliye olunmuş idi. İşbu Receb-i şerîf’in yirmi üçüncü günü yine paralıkda on dirhem noksân ile yine ahz olunup mezbûr Bayram mütenebbih olmayıp fi‘il-i sâbıkında ısrâr eylediği zâhir ve gereği gibi ta‘zîr olunmağa muhtâc olmağla Seddülbahr Kal‘ası’nda li-ecli’t-te’dîb kal‘a-bend olunmak üzere huzûr-ı âlîlerine i‘lâm olundu. Fî 28 B sene 1179.