İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 441 Hüküm no: 541 Orijinal metin no: [227-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müslüman olan Fatıma’nın Bedros aleyhindeki menzil iddiasında anlaşma sağlanması Davud Çavuş Vakfı’ndan Dîvân-ı âlî mahâllesi’nde vâki‘ menzilden 33 guruş ibrâ Ma‘rûz, Arzuhâl eden mu‘arrefetü’z-zât Fâtıma nâm mühtediye meclis-i şer‘-i enverde mahmiye-i İstanbul’da Gedikpaşa kurbünde Divan-ı âlî mahâllesinde vâki‘ Davud Çavuş Vakfı’ndan olan ma‘lûmü’l-hudûd menzilin nısf-ı şâyi‘ine vâzı‘ü’l-yed olan Bedros zimmî muvâcehesinde vakf-ı mezkûr mütevellîsi hâzır olduğu hâlde fi’l-asl menzil-i mezkûr yirmi sene mukaddem hâlik olan ceddim Elmas nâm Nasrâniyenin tasarrufunda iken deyni mukābelesinde es-Seyyid Mehmed nâm kimesneye vefâen re’y-i mütevellî ile ferâğ ve hâlik oldukda kızları Sima ve Pirapiyon ve Meryem ile benim anam olan Hanım’a âdiyen intikāl eyledikde hâletem mezbûre Sima evlâdıyla menzil-i mezkûru mezbûr es-Seyyid Mehmed’den istihlâs ve ba‘dehû anam mezbûre hanım dahi on bir sene mukaddem hâlik oldukda rub‘ hissesi bana intikāl etmiş iken merkūm Bedros menzil-i mezkûra şerîki Dudu nâm Nasrâniye ile fuzûlî vaz‘-ı yed eder deyü iddi‘â ve bâ-vesâtet-i Müslimîn merkūm Bedros müdde‘iye-i mezbûreye otuz üç guruş verip da‘vâsından müdde‘iye-i mezbûrenin zimmetini ibrâ etdikde ol dahi meblağ-ı mezkûru ahz u kabz edip menzil-i mezkûrda olan rub‘ hissesine [228] müte‘allıka âmme-i da‘vâdan zimmetini ibrâ ve her biri ibrâyı kabûl [ve] menzil-i mezkûrda alâkası kalmadığını ikrâr ve kat‘-ı münâza‘a eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 28 Receb sene 1179.