İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 462 Hüküm no: 572 Orijinal metin no: [240-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstavrakioğlu tarafından koyun satın almakla görevlendirilen Bozoklu Ali ve sairlerinin zimmetlerinin ibra olunması Kasabbaşı ağaya celeb ibrâsı Âsitâne-i aliyye’de hâlâ kasabbaşı olan fahrü’l-işbâh Ali Ağa b. el-Hâc Muslı tarafından vech-i âtî üzere ikrâra vekîl-i müsecceli diğer Ali Ağa b. Abdullah meclis-i şer‘-i şerîf-i enverde celeb tâifesinden işbu bâ‘isü’l-vesîka Bozoklu el-Hâc Ali b. Mehmed ve Miçovalı Apostol v. Dimitri ve İsteryo v. Dimitri ve Kosta v. İsteryo muvâcehelerinde bi’l-vekâle ikrâr ve takrîr-i kelâm edip bundan akdem hâlik olan İstavrakioğlu mezbûrûnu Tatarlık ve Boğdan taraflarından ağnâm iştirâ ve sermâyelerini ol tarafda âdemlerinden ahz etmek üzere irsâl eder oldukda iştirâ olunacak ağnâmın masârıf-ı lâzımesi için bu tarafdan ber-vech-i peşîn mezbûrûna iki bin guruş verip ve mezbûrûndan temessük dahi alıp irsâl, onlar dahi ol tarafa varıp aded-i re’s ve fiâtı defterlerimizde ma‘lûm on beş bin guruşluk koyun iştirâ ve iki bin guruşu masârıfına sarf ve sermâye-i mezkûrenin dahi yedi bin beş yüz guruşu ol tarafda âdemîsi Kirkor’dan ve yine yedi bin beş yüz guruş Civelekoğlu Andonaki nâm zimmîlerden alıp sâhiblerine edâ ve kendüler dahi sermâyeleriyle ale’l-iştirâki’s-seviy ağnâm iştirâ eyledikden sonra bâ-fermân-ı âlî hâlik-i merkūmun ağnâmı müvekkilim mezbûrun tarafından işbu mezbûrûnun koyunlarıyla ma‘an zabt olundukdan sonra işbu mezbûrûnun dahi koyunlarının bahaları Âsitâne’de verilmek üzere ma‘an tesyîr olunmuş idi. Hâlâ hâlik-i mezbûrun ağnâm-ı mezkûrede sermâyesi olan on beş bin guruş ve mezbûrûnun peşîn masârıfı için aldığı iki bin guruş ki cem‘an on yedi bin guruş çıkdıkdan sonra mezbûrûnun koyunları Âsitâne’ye gelince olunan masârıfı için rızâlarıyla sermâyelerinden sekiz yüz yetmiş iki guruş hatt ü tenzîl ve bâkī dokuz bin sekiz yüz elli dokuz guruş mezbûrûndan ahz ve bâkī kalan ağnâmda alâkalar kalmamağla hâlik-i merkūmun gerek sermâyesi ve gerek peşîn aldıkları iki bin guruş müvekkilim mezbûrun hesâbına dâhil ve zimmetine terettüb etmekle mezbûrûnun zimmetlerinde masârıf-ı mezkûreden ve sermâyeden bir akçe bâkī kalmamağla temessükleri dahi zuhûr eder ise amel olunmaya dediğini mezbûrûn tasdîk etmeleriyle mâ-vaka‘a bi’t-taleb ketb olundu. Fî 20 min-Şa‘bân sene [1]179. Şuhûdül-hâl: el-Hâc Abdullah Efendi, Molla Mehmed, Molla İsmail, el-Hâc Hüseyin Ağa, Osman, diğer Mehmed ve gayruhum. Nüsha-i sâniye dahi verilmişdir.