İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 400 Hüküm no: 494 Orijinal metin no: [95a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanova seferinde vefat eden Mehmed Çavuş’un nafaka bedelinin muhallefatından karşılanması (…) sipâhî oğlanları on beşinci bölük çavuşlarından fahrü’l-akrân (…) meclis-i şer‘-i şerîfde Rumeli’nde kal‘a-i Eğri’den dönüp Belgrad’da vefât eden [Mahmud Çavuş] b. Abdullah’ın zâhirde zevcesi Sultane bt. Abdullah’dan gayri vâris-i ma‘rûfu olmamağile mahrûse-i İstanbul’da vâki‘ Beytü’l-mâl-i hâssa emâneti hasebiyle muhallefâtına vâzı‘ü’l-yed olan Mehmed Çavuş b. Abdullah mahzarında takrîr-i merâm edip müteveffâ-yı merkūm Bayburdî Mehmed Çavuş Yanova seferine gitdikde beni tevkîl-i şer‘î ile kendiden mukaddem vefât eden evlâdının ve zevcesi mezbûre Sultane’nin nafakası vesâir levâzım-ı şer‘iyeleri için harc ü sarfa vekîl edip ben dahi emr-i vekâleti kabûl etdikden sonra vekâletim hasebiyle nafakalarına ve sâir levâzım-ı şer‘iyelerine kendi mâlımdan iki bin akçe harc ü sarf eyledim. Sarf etdiğim meblağ-ı merkūm iki bin akçemi Bayburdî mezbûr Mehmed Çavuş’dan kabz ve tesellüm etmedin vefât etdi, hakkımdır hâlâ muhallefâtından taleb ederin suâl olunsun dedikde gıbbe’s-suâl ve akībe’l-inkâr ve’l-istişhâd sâbıkā mahrûse-i mezbûrede yine müteveffâ-yı merkūm sâkin olduğu Ördek Kasab mahallesi sâkinlerinden Mehmed Çelebi b. el-Hâc İbrahim ve Mehmed b. Yahya el-kayyum meclis-i şer‘-i şerîfe li ecli’ş-şehâde hâzırân olup fi’l-vâki‘ müteveffâ-yı mezbûr [Mehmed Çavuş] b. Abdullah mahalle-i mezbûreden Yanova seferine gitdikde müdde‘î-yi [mezbûr Mehmed Çavuş] b. Abdullah’ın tevkîl-i şer‘î ile kendiden mukaddem vefât eden evlâdının ve zevcesi mezbûre Sultane’nin nafakası vesâir levâzım-ı şer‘iyeleri için harc ü sarfa vekîl etdikde mezbûr dahi emr-i vekâleti kabûl etdi. Husûs-ı tevkîle biz şâhidleriz şehâdet-i şer‘iye dahi ederiz deyü edâ-i şehâdet-i şer‘iye etdiklerinde şehâdetleri gıbbe’t-tezkiye ve’t-ta‘dîl makbûle olup mûcebiyle hükmolundu. Fî 2 Ramazan sene 1005. Şühûdü’l-hâl: el-Muhzırûn bi’l-mahkemeti’ş-şerîfe.