Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 198 Hüküm no: 291 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varid ile kardeşinin bağlarını Mustafa ve Hüseyin'e sattıkları Medîne-i Üsküdar’a muzâfe Adalar nâhiyesine tâbi‘ Kartal nâm karye mütemekkinlerinden Varid v. Fozi ve li-ebeveyn karındaşı (...) nâm Nasrânî tarafından husûs-ı âti’l-bey‘e ve kabz-ı semene ve kendüye îsâle vekîl olduğu Todoş v. Yani ve (...) v. Anton nâm Nasrânîler şehâdetleriyle şer‘an vekâleti sâbite olan Yorgi v. Lanbornos nâm Nasrânîler meclis-i şer‘-i şerîf-i enver ve mahfil-i dîn-i münîf-i ezherde mahmiye-i İstanbul’da Kumkapı dâhilinde Tavaşî Süleyman mahallesi sâkinlerinden işbu bâ‘isü’l-kitâb el-Hâc Mustafa b. Mehmed ve yine mahmiye-i mezbûrede Kadırga Limanı’nda Bostancıbaşı mahallesi sükkânından el-Hâc Hüseyin b. Hasan nâm kimesne mahzarlarında her biri ikrâr ve takrîr-i kelâm [edip] asâleten ve vesâyeten ikrâr edip akd-i âti’z-zikrin sudûruna değin silk-i mülk-i sahîhimizde olup Yakacık toprağında vâki‘ bir tarafdan Hacı Abdurrahman Ağa bağı ve bir tarafdan ba‘zen Mehmed Beşe ve Müezzin İbrahim Çelebi bağı ve bir tarafdan Ali Dede bağı ve taraf-ı âharı tarîk-i âm ile mahdûd bir kıt‘a ber-vech-i tahmîn on bin hora kürûmu ve üç bin kış üzümü bağımızı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘iyle el-Hâc Hüseyin Ağa ile el-Hâc Mustafa’ya iki yüz beş guruşa ale’l-iştirâki’s-seviyy asâleten ve vekâleten bey‘ ve teslîm eylediğimizde onlar dahi ber-minvâl-i muharrer ba‘de’l-ahz ve’l-kabz semeni olan meblağ-ı mezbûr iki yüz beş guruşu müşteriyân-ı merkūmânlar[dan] her birimiz tamâmen bi’l-asâle ve bi’l-vekâle ahz u kabz eyledik, ba‘de’l-yevm bağ-ı mahdûd-ı mezkûr mezbûrân el-Hâc Mustafa ile el-Hâc Hüseyin Ağa’nın mülk-i müşterâları ve hakk-ı sırflarıdır, bizim kat‘â alâka ve medhalimiz kalmadı dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşer min-Recebi’l-ferd li-sene seb‘a ve ışrîn ve mi'e ve elf. El-Fakīr es-Seyyid Ahmed el-müvellâ-hilâfeten bi-nâhiyei Adalar. Şuhûdü’l-hâl: Ebubekir Beşe [b.] Halil [sâkin-i] Kartal, İmâm İsmail Efendi sâkin-i Kartal, Hüseyin Beşe b. Hamza, Musa Beşe sâkin-i Kartal, Mehmed Beşe Tiryâkîzâde sâkin-i Kartal, Halil Beşe b. Abdülbaki, Mehmed Efendi b. Mustafa sâkin-i Yakacık, Kaba? Mustafa sâkin-i (°).