Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 687 Hüküm no: 737 Orijinal metin no: [113a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Nasuh’un Sarıca Paşa Mahallesi Avarız Vakfı’na olan iki bin iki yüz akçe borcunu ödemek üzere Hasan Çavuş’a havale ettiği Mahmiye-i Edirne’de el-Hâc Pervane mahallesinin imâmı olup merhûm Sarıca Paşa’nın mahalle-i mezbûre fukarâsı için vakfeylediği nukūdun bi’l-fi‘il kāimmakām-ı mütevellîsi olan fahrü’l-eimme el-Hâc Hüseyin b. Yusuf nâm kimesne meclis-i şer‘-i şerîf-i şâmihu’l-imâd ve mahfil-i dîn-i münîf-i râsihu’l-erkânda Mehmed b. Nasûh nâm kimesne mahzarında üzerine takrîr-i da‘vâ edip mezbûr Mehmed zimmetinde vakf-ı mezbûr malından altı bin nakd-i râyic fi’l-vakt olup üç bin akçesini bundan akdem ahz ve istîfâ edip bâkī zimmetinde üç bin akçe kalmışdır suâl olunup alıverilmesi matlûbumdur dedikde gıbbe’s-suâl mezbûr Mehmed cevâbında fi’l-vâki‘ vakf-ı mezbûr malından zimmetimde meblağ-ı mezbûr altı bin akçe olup üç bin akçesin edâ [ve] îfâ ettiğimde devr-i şer‘î olmadın murâbaha nâmıyla dokuz yüz akçe dahi bende olup meblağ-ı mezbûr dokuz yüz akçeyi dahi asl-ı mâl-ı vakf-ı mezbûra zam ile üç bin dokuz yüz akçe teslîm olup bâkī zimmetimde iki bin yüz akçe vakf-ı mezbûra deynim kalmışdır dedikde gıbbe’l-istintâk mezbûr el-Hâc Hüseyin Çelebi meblağ-ı mezbûr dokuz yüz akçeyi murâbaha nâmında olup kabz ettiğin ikrâr edip ve devr-i şer‘î etdiğinde beyyineden izhâr-ı acz edip istihlâf ettiğinde ol dahi alâ vefki’l-mes’ûl yemîn billâhi’l-aliyyi’l-azîm ettikden sonra mezbûr Mehmed zimmetinde olan iki bin yüz akçeyi hâzır bi’l-meclis olan Hasan Çavuş b. Mustafa nâm kimesneye havâle-i şer‘iyye ile havâle eyledikde mütevellî kāimmakāmı olan mezbûr el-Hâc Hüseyin Çelebi dahi havâle-i mezbûreyi kabûl [113b] etmeğin mâ-hüve’l-vâki‘ gıbbe’t-taleb ketb olundu. Hurrire fi’l-yevmi’s-sadis min-Şevvâli’l-mükerrem li-sene semân ve sittîn ve elf. Şühûdü’l-hâl: Es-seyyid Ali Çelebi b. es-Seyyid Ahmed, Mehmed b. Abdullah, diğer Mehmed b. Mustafa, el-Hâc İbrahim ve gayruhüm.