Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 711 Hüküm no: 777 Orijinal metin no: [118b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb Bey b. Veli ve ortağı Hacı İbrahim’in Hancı Mahmud Çelebi b. Veli’de olan alacaklarını tahsil edip zimmetini ibra ettikleri Mahmiye-i İstanbul sükkânından olup hâlâ medîne-i Edirne’de sâkin olup Receb Bey b. Veli nâm kimesne ile şerîki el-Hâc İbrahim nâm kimesne meclis-i şer‘-i hatîr-i lâzimü’t-tevkīrde işbu sâhibü’l-kitâb Hancı Mahmud Çelebi b. Veli nâm kimesne mahzarında herbiri ikrâr-ı tâm ve takrîr-i kelâm edip mezbûr Mahmud Çelebi ( )nin fermân olan sürsât zahîresini sürsât emîni olan İsmail Ağa’ya teslîm harcı için şerîk olduğumuzda maldan on bir bin beş yüz akçe istidâne ve yedimizden ahz u kabz eylemişidi hâlâ meblağ-ı mezbûr on bir bin beş yüz akçeyi mezkûr Mahmud Çelebi yedinden bi’t-tamâm ve’l-kemâl ahz u kabz eyledik meblağ-ı mezbûrdan merkūm Mahmud Çelebi zimmetinde bir akçe ve bir habbe hakkımız bâkī kalmadı dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min Ramazâni’l-mübârek li-sene semân ve sittîn ve elf. Şühûdü’l-hâl: Ahmed Beşe b. Hızır, Hasan Beşe b. Hüseyin, Mahmud Beşe, Mehmed Ali ve gayruhüm.