Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 725 Hüküm no: 798 Orijinal metin no: [123a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli b. Piri’nin bin yedi yüz akçe alacağı olduğu iddiasıyla İbrahim Bey b. Ali aleyhine açtığı davada iddiasını ispat edemediği Hâssa bostancılarından Veli b. Pîrî nâm kimesne mahmiye-i Edirne’de meclis-i şer‘de işbu bâ‘isü’r-rakīm İbrahim Bey b. Ali mahzarında üzerine da‘vâ ve takrîr-i kelâm edip mezbûr İbrahim Bey yedine bi-tarîkı’l-vedî‘a bin yedi yüz akçe def‘ ü teslîm ol dahi ahz u kabz eylemişidi hâlâ vermede te‘allül eder suâl olunup alıverilmek matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ikāmet-i beyyineden izhâr-ı acz edip istihlâf etmeğin vech-i muharrer üzere müdde‘î-i mezbûr yedinden bi-tarîkı’l-vedî‘a bin yedi yüz akçe ahz u kabz eylemediğine merkūm İbrahim Bey yemîn billâhi’l-aliyyi’l-azîm etmeğin bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Zilka‘deti’ş-şerîfe li-sene semân ve sittîn ve elf. Şühûdü’l-hâl: Mehmed Efendi b. Ahmed, İsmail Efendi el-kādî, Mehmed Çelebi b. Ahmed, Bayram Beşe, Arslan Beşe ve gayruhüm mine’l-hâzırîn.