Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 727 Hüküm no: 802 Orijinal metin no: [123b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayas Paşa Vakfı’nın üçte bir tevliyet hissesinin Hadice Hatun’a teslimi Vilâyet-i Rumeli’nde Vize Sarayı kazâsında vâki‘ merhûm Ayas Paşa Vakfı’nın tevliyet ve gallesi evlâd-ı zükûra meşrûta olmağla evlâd-ı zükûrdan olup ber-mûceb-i şart-ı vâkıf vakf-ı mezbûra mütevellî olan Mehmed Ağa b. Mehmed nâm kimesne mahmiye-i Edirne’de meclis-i şer‘de fahrü’l-muhadderât Hadice Hâtun bt. Atâullah Bey tarafından husûs-ı âti’z-zikri tasdîka vekîl olup nehc-i şer‘î üzere vekâleti sâbite olan Ali Efendi mahzarında takrîr-i kelâm edip müvekkile-i mezbûre evlâd-ı vâkıfdanım deyu tevliyet ve galle-i vakf-ı mezbûra müdâhale eylemek murâd etmekle hâlâ müvekkile-i mezbûrenin tevliyet ve galle-i vakf-ı mezkûre [ile] kat‘â alâkası olmadığı mukarrerdir ve lâkin müvekkile-i mezbûre min ba‘d vakf-ı merkūma müdâhale etmeyip ve yedinde olan vakfiyeyi bana teslîm [124a] etmek üzere rızâ ve hüsn-i ihtiyârıyla vakf-ı mezbûrun öşür mahsûlünün cihet-i tevliyet olan nısfı ihrâc olundukdan sonra bâkī kalan nısf mahsûlün üç sehimden bir sehm hisseyi mezbûre Hadice Hâtun’a def‘ ü teslîm etmek üzere ol dahi vech-i muharrer üzere yedinde olan vakfiyeyi bana teslîm edip min ba‘d vakfa müte‘allik nizâ‘ etmemek üzere ta‘ahhüd eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî gurreti Zilhicceti’ş-şerîfe li-sene semân ve sittîn ve elf. Şühûdü’l-hâl: İftihârü’l-emâcid ve’l-ekârim Ammâr b. Velî, Mustafa Efendi, Ahmed Çelebi, Musa b. ( ), Ali b. ( ).