Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 748 Hüküm no: 835 Orijinal metin no: [131a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ali’nin boşandığı kocası Mustafa b. Mehmed aleyhine açtağı mehir davasında iddiasını ispat edemediği Mahmiye-i Edirne’de Sarıca Paşa mahallesinde sâkine Âişe bt. Ali meclis-i şer‘de zevc-i mutallıkı Mustafa b. Mehmed mahzarında da‘vâ ve takrîr-i kelâm edip mezbûr Mustafa zevcim olup beni tatlîk etmekle zimmetinde mütekarrir olan bin üç yüz akçe mehr-i müeccelimi hâlâ taleb ederim suâl olunup alıverilmek matlûbumdur dedikde gıbbe’s-suâl mezbûr Mustafa cevâbında fi’l-vâki‘ Âişe Hâtun zevcem olup hüsn-i mu‘âşeretimiz olmamağla ma‘kūdün-aleyh olan bin üç yüz [akçe] mehr-i müeccelinden ve nafaka-i iddet-i ma‘lûme ve meûnet-i süknâsından fâriğa olmak üzere ve firâşımdan olan hamli ba‘de’t-tevellüd yedi sene tamâmına değin kendi malıyla infâk ve iksâ etmek üzere muhâla‘a-i sahîha-i şer‘iyye ile muhâla‘a eylediğinde ben dahi hul‘-ı mezbûru kabûl eylediğimden sonra herbirimiz âharın zimmetini zevciyyete müte‘allik olan cemî‘ de‘âvî ve husûmâtdan ibrâ ve ıskāt eylediğini hâvî hüccet-i şer‘iyye dahi vermişdir deyu mahmiye-i mezbûrede Mahkeme-i Suğrâ’da hilâfeten müvellâ olan Osman Efendi imzâsıyla mümzâ ve hatemiyle mahtûme ve bin altmış üç Recebü’l-müreccebi’nin on beşinci günü tarihiyle müverrah vech-i muharrer üzere takrîrine muvâfık hüccet-i şer‘iyye ibrâz edip ve muvâcehesinde feth u kırâat olunup istintâk olundukda mazmûn-ı hüccet-i mezkûreyi ikrâr ve i‘tirâf etmeğin mezbûre Âişe Hâtun bî-vech mu‘ârazadan men‘ olunup mâ-vaka‘a bi’t-taleb ketb olundu. Fî gurreti Muharremi’l-harâm li-sene tis‘a ve sittîn ve elf. Şühûdü’l-hâl: Mehmed b. Mustafa, İsmail Efendi, Arslan Bey b. ( ), İsa Bey b. Ahmed.