Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 94 Hüküm no: 53 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Yusuf b. Abdullah’ın İbrahim’deki alacağının çocuklarının vasîsi tarafından tahsil edildiği Tüccâr tâifesinden olup Vilâyet-i Rumeli’nde kasaba-i Tatarpazarcığı’nda sâkin iken bundan akdem vefât eden el-Hâc Yusuf b. Abdullah’ın sulbî sagīr oğulları Ahmed ve Hüseyin’in vasîyy-i muhtârları olan el-Hâc Ahmed b. Ramazan meclis-i şer‘-i hatîr-i lâzımü’t-tevkīrde müteveffâ-yı mezbûr el-Hâc Yusuf hayatında zimemde olan hukūkunu ahz ü kabza vekîli olmağla zikr-i âtî meblağa vâzı‘u’l-yed olan işbu râfi‘u’l-kitâb el-Hâc İbrahim b. Abdullah mahzarında bi’l-vesâye ikrâr ve takrîr-i kelâm edip mezbûr el-Hâc İbrahim müteveffâ-yı mezbûrun hayatında mahmiye-i İstanbul’da mevâzi‘-ı müte‘addide demir âlâtı semeninden olan hukūkunu ahz ü kabz ve kendüye îsâle vekîli olmağla ber-mûceb-i defter-i kassâm vekâleti hasebiyle min-haysü’l-mecmû‘ yüz sekiz bin yedi yüz yetmiş sekiz akçe ahz ü kabz eylediğinden sonra mezbûr el-Hâc Yusuf meblağ-ı mezbûru kable’l-istifâ vefât etmeğin hâlâ meblağ-ı mezbûr yüz sekiz bin yedi yüz yetmiş sekiz akçeyi mezbûr el-Hâc İbrahim yedinden vesâyetim hasebiyle bi’t-tamam ve’l-kemâl ahz ü kabz eyledim yedinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Zilka‘deti’ş-şerîfe li-sene tis‘în ve elf. Şuhûdü’l-hâl: Halil Çelebi b. İbrahim, el-Hâc Hüseyin b. Hasan, el-Hâc Siyavuş? b. Abdullah, Ahmed b. Yusuf, Ali b. Mehmed, Ali b. Veli.