Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 109 Hüküm no: 68 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçerilerin kırk altıncı cemaatine mahsus para vakfının önceki mütevellisi Osman’ın şimdiki mütevellî Hasan Çelebi’deki alacağını tahsil etmesi Dergâh-ı âlî -dâme mahfûfen bi’l-meâli- yeniçerilerinden kırk altıncı cemâ‘ate mahsûs oda neferâtının mühimmâtına mevkūfe nukūda sâbıkā mütevellî olan işbu râfi‘u’l-kitâb el-Hâc Osman b. Mustafa meclis-i şer‘-i hatîrde nukūd-ı mevkūfe-i mezbûrenin bi’l-fi‘il mütevellîsi olan Hasan Çelebi b. Abdullah nâm kimesne mahzarında üzerine da‘vâ ve takrîr-i kelâm edip ben bundan akdem vakf-ı mezbûrun mütevellîsi olup hâlâ azl olunmağla yedimde olan muhâsebe defteri nâtık olduğu üzre hîn-i tevliyetimde makbûzum olan zimem ve nukūd cem‘an altı bin yedi yüz kırk yedi guruş ile zamân-ı tevliyetimde rıbhından müctemi‘ olan bin dört yüz doksan yedi guruş ki min-haysü’l-mecmû‘ sekiz bin iki yüz kırk dört esedî guruş[u] mütevellî-i mezbûr Hasan Çelebi’ye def‘ ü teslîm ol dahi ber-vech-i muharrer ahz ü kabz eylediğinde (...) [mâ‘adâ] murâbaha nâmına bi-gayr-ı hakkın yüz otuz esedî guruşumu dahi ahz ü kabz etmeğin hâlâ meblağ-ı mezbûr yüz otuz guruşu ve hîn-i tevliyetimde oda-i mezbûre neferâtı ile kavl eylediğim beher sene yüz guruşdan beş senede müctemi‘ olan beş yüz guruş ücretim ki cem‘an altı yüz otuz guruş mütevellî-i mezbûr Hasan Çelebi’den taleb ederim suâl olunsun dedikde gıbbe’s-suâl mütevellî-i mezbûr Hasan Çelebi cevâbında ber-vech-i muharrer makbûzum olan meblağ-ı mezbûr sekiz bin iki yüz kırk dört guruşdan ziyâde yüz otuz esedî guruş dahi ahz ü kabz eyleyip ve mezbûr el-Hâc Osman ile ancak beher sene otuz guruş ücret kavl olunmağın müdde‘î-i mezbûr el-Hâc Osman’a beş senede müctemi‘ yüz elli guruş ile cem‘an iki yüz seksen esedî guruş deyni olduğunu ikrâr lâkin minvâl-i meşrûh üzre oda-i mezbûre neferâtının beher sene ziyâde yetmiş esedî guruş ücret dahi kavl eylediklerini bi’l-külliye inkâr edicek müdde‘î-i mezbûrdan ziyâdeyi mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müdde‘î-i mezbûr el-Hâc Osman oda-i mezbûre neferâtı ile ziyâde beher sene yetmiş esedî guruş ücret dahi kavl ettikleri ma‘lûmu olmadığına mütevellî-i mezbûr Hasan Çelebi’ye yemîn teklîf olundukda ol dahi hasbe’l-mesûl yemîn billâhi te‘âlâ eyledikde ziyâde-i mezbûre da‘vâsından müdde‘î-i mezbûr men‘ olundukdan sonra ikrârı mertebesi olan meblağ-ı mezbûr iki yüz seksen guruşu müdde‘î-i mezbûr el-Hâc Osman’a def‘ ü teslîme mezbûr Hasan Çelebi’ye tenbîh birle mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Zilka‘deti’ş-şerîfe li-sene tis‘în ve elf. Şuhûdü’l-hâl: Ömer Beşe el-Mübâşir, el-Hâc Yusuf b. Abdülmennan, el-Hâc Mustafa b. Çukadâr, Mehmed Çelebi b. Haydar.