Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 347 Hüküm no: 327 Orijinal metin no: [81b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un boşandığı eşi Takyeci Mustafa aleyhindeki mehir ve nafaka davasında anlaşma sağlanması Mahmiye-i İstanbul’da Hoca Hayreddin mahâllesi sâkinelerinden olup zâtı ma‘rifet-i şer‘iyye ile ârifân Takyeci Mustafa Çelebi b. Süleyman ve Mehmed Çelebi b. Abdullah nâm kimesne ta‘rîfleriyle mu‘arrefe olan Âişe bt. İbrahim nâm hatun mahmiye-i mezbûrede meclis-i şer‘de zevc-i mutallıkı işbu râfi‘ü’l-vesîka Takye[ci] Mustafa b. Abdülkadir nâm kimesne mahzarında bi-tav‘ihâ ikrâr ve takrîr-i kelâm edip mezbûr Mustafa zevcim olup bundan akdem beni bâyinen tatlîk etmekle zimmetinde mütekarrir ve ma‘kūdün-aleyh olan bin akçe mehr-i müeccelim ile nafaka-i iddet-i ma‘lûmem <<üzerlerine>> ve meûnet-i süknâm için bi’t-terâzî ta‘yîn olunan üç yüz akçe ki cem‘an bin üç yüz akçe hakkım zimmetinde kalmağın meblağ-ı mezbûru zevcim mezbûr Mustafa’dan bundan akdem taleb ve da‘vâ eylediğimde bana teslîmden imtinâ‘ edip beynimizde nizâ‘-ı küllî vâki‘ olmuş idi, El-hâletü hâzihi beynimize muslihûn tavassut edip da‘vâ-i mezkûremden beni mezbûr Mustafa ile altı yüz elli akçe üzerine sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezbûru mezbûr Mustafa bana def‘ ü teslîm, ben dahi yedinden tamâmen ahz u kabz eyledim. Ba‘de’l-yevm hukūk-ı zevciyete müte‘allıka da‘vâdan her birimiz âharın zimmetini ibrâ-i âm ile ibrâ ve iskāt eyledik, dedikde gıbbe’t-ta‘dîli’ş-şer‘î mâ-vaka‘a bi’t-taleb ketb olundu. Fî-gurreti Cumâdelûlâ sene 1116. Şuhûdü’l-hâl: Takyeci Mustafa Çelebi b. Süleyman, Mehmed Çelebi b. Abdullah, Mustafa b. Abdullah, Mahmud Beşe b. Hasan, Mehmed Çelebi b. Rasul, Çukadâr Ali Beşe, Sarrâc Mehmed Çelebi b. ( ).