Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 358 Hüküm no: 341 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb Beşe’nin Ahmed Beşe ve sairleri aleyhindeki yaralama davasında sulh olması Mahmiye-i İstanbul’da Karagümrük kurbünde sâkin Receb Beşe b. Hüseyin nâm kimesne mahmiye-i mezbûrede meclis-i şer‘de bâ‘isü’l-kitâb Ahmed Beşe b. Ali nâm kimesne mahzarında ikrâr ve takrîr-i kelâm edip mezbûr Ahmed Beşe târîh-i kitâbdan bir gün mukaddem mahmiye-i mezbûre hısnı ebvâbından Edirne kapısı hâricinde vâki‘ mezaristanda rüfekāsı hâzirûn bi’l-meclis Hasan Beşe b. Yakub ve Nâzır? Mehmed Beşe b. Abdullah ve Ebubekir Beşe b. Abdurrahman ve diğer Hasan ile nişâna tüfenk atarlar iken mezbûr Ahmed Beşe hatâen tüfenk kurşunuyla benim sağ tarafımın kaba uyluğumdan darb ve kurşun kaba etimde kalıp beni mecrûh etmekle husûs-ı mezbûru bundan akdem mezbûr Ahmed Beşe’den da‘vâ ve mûceb-i şer‘îsi icrâ sadedinde olduğumda beynimizde münâza‘ât-ı vâkı‘a olmuş idi. El-hâletü hâzihi beynimize muslihûn tavassut edip da‘vâ-i mezbûremden beni mezbûr Ahmed Beşe ile on guruşa sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezbûr on guruşu mezbûr Ahmed Beşe yedinden tamâmen ahz u kabz eyledim. Harc-ı mezkûra ve mâ-yahdesu minhuya müte‘allıka âmme-i da‘vâdan merkūm Ahmed Beşe’yi ve rüfekāsı mezbûrûn Hasan Beşe ve Nâzır Mehmed Beşe ve Ebubekir ve diğer Hasan’ı ibrâ-i âm ile ibrâ ve iskāt eyledim, fîmâ-ba‘d merkūmûn ile husûs-ı mezbûra müte‘allıka aslâ da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Cumâdelûlâ li-sene sitte aşere ve mi’e ve elf. Şuhûdü’l-hâl: Ahmed Beşe b. İbrahim, Mehmed Beşe b. Ahmed, Hüseyin Efendi b. Himmet, İsmail Efendi el-kâtib, Mehmed Emin Efendi kâtib, Mumcu İbrahim Beşe mübâşir.