Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 363 Hüküm no: 348 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un vefat eden Beyzade Hüseyin Ağa’nın varisleri ile alacak davasında sulh olması Mahmiye-i İstanbul’da merhûm ve mağfûrun-leh Sultân Süleyman Han Câmi‘-i şerîfi kurbünde Samanviran mahâllesi sâkine[lerinden] Emine bt. Ebubekir Efendi nâm hatun zâtı ba‘de’t-ta‘rîfi’ş-şer‘î mahmiye-i mezbûrede meclis-i şer‘-i hatîr-i lâzımü’t-tevkīrde yine mahmiye-i mezbûrede vâki‘ Beyzâde Hüseyin Ağa nâm sâhibü’l-hayrın nukūd-ı mevkūfesine mütevellî olup bundan akdem vefât eden Hüseyin Efendi’nin verâseti zevce-i metrûke-i menkûhası Rabia bt. Habib nâm hatun ile sulbî kebîr oğlu Mehmed ve sulbiye-i sagīre kızı Fâtıma’ya münhasıra olduğu şer‘an zâhir oldukdan sonra işbu bâ‘isü’l-kitâb mezbûr Mehmed Efendi ile sagīre-i mezbûrenin tesviye-i emrine kıbel-i şer‘den mansûb vasîsi olan mezbûre Rabia Hatun tarafından husûs-ı âti’l-beyanı tasdîka vekîl olduğu zât-ı mezbûreyi ma‘rifet-i şer‘iyye ile ârifân olan Abdullah Çelebi b. el-Hâc Mehmed ve Hüseyin Çelebi b. Musa şehâdetleriyle sâbite olan Abdülbaki Çelebi b. Abdülkerim mahzarında bi-tav‘ihâ ikrâr ve takrîr-i kelâm edip bundan akdem müteveffâ-yı mezbûr Hüseyin Çelebi Efendi’nin hayâtında mâl-ı vakf-ı mezbûrdan on altı guruş istidâne ve kabz ve mukābelesinde mecmû‘u elli guruş kıymetli bir çuka kelle-pûş üzerinde işleme yedi dal inci ve yedi dal bir inci saçlık ve altı miskāl bir tek altın bileziğimi mütevellî-i mezbûr Hüseyin Efendi’ye rehin ve teslîm ol dahi irtihân ve kabz etmekle hâlâ deyn-i mezkûru edâ ve fekk-i rehin murâd etdiğimde onlar dahi husûs-ı mezbûru inkâr edip ben müdde‘âmı isbât sadedinde olup bu vech üzere beynimizde münâza‘ât-ı kesîre vâkı‘a olmuş idi. El-hâletü hâzihi mezbûrân Mehmed Efendi ve müvekkile-i mezbûre Rabia Hatun kendi mallarından bi-tarîkı’s-sulh bana on beş guruş def‘ ü teslîm ben dahi yedlerinden tamâmen ahz u kabz edip husûs-ı mezbûra müte‘allıka âmme-i da‘vâ ve mutâlebâtdan mezbûr Mehmed Efendi ile müvekkile-i mezbûre Rabia Hatun’un zimmetini ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min-Cumâdelûlâ li-sene sitte aşere ve mi’e ve elf. Şuhûdü’l-hâl: el-Hâc Salih b. Hüseyin, Molla Süleyman b. Ali, Molla Mehmed b. Receb, Mustafa Çelebi b. Ali.