Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 398 Hüküm no: 398 Orijinal metin no: [94b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Muslı’nın küçük çocukları Mehmed ve Ayşe için nafaka tayini Mahmiye-i İstanbul’da Sarrâcishak mahâllesi sâkinelerinden olup zâtı Ahmed Çelebi b. Abdurrahman ve Abdurrahman Bey b. Şaban nâm kimesneler ta‘rîfleriyle mu‘arrefe olan Fâtıma bt. Muslı nâm hatun mahmiye-i mezbûrede meclis-i şer‘de takrîr-i kelâm ve ta‘bîr ani’l-merâm edip zevcim olup beni talâk-ı bâyin ile tatlîk eden hâlâ Mısr-ı Kāhire’de Azebler Ocağı’nda odabaşı olan Ahmed Ağa b. Abdullah nâm kimesnenin firâşından hâsıl ve benden mütevellid olup hâlâ bi-hakkı’l-hıdâne terbiyemde olan oğlum işbu sagīr Mehmed ve kızım Âişe nafaka ve kisveye muhtâc olmağla babası mezbûr Ahmed Ağa üzerine kadr-ı kifâye nafaka ve kisve-baha farz ve takdîr olmak matlûbumdur dedikde, hâkim-i muvakkı‘-ı sadr-ı kitâb tûbâ lehû ve hüsnü-meâb hazretleri dahi sagīrân-ı mezbûrânın nafaka ve kisve-baha ve sâir levâzım-ı zarûriyeleri için mezbûr Ahmed Ağa mütemevvil olup tahammülü olduğunu zeyl-i vesîkada mastûrü’l-esâmi Müslimîn haber vermeleriyle târîh-i kitâbdan her birine yevmî onar paradan beher yevm ikisine yirmişer para nafaka ve kisve-baha farz ve takdîr edip meblağ-ı mefrûz-ı mezbûru sagīrân-ı mezbûrânın nafaka ve kisve-baha ve sâir levâzım-ı zarûriyelerine harc u sarfa ve vakt-i zarûretde istidâne ve lede’z-zafer babaları mezbûr Ahmed Ağa’ya rücû‘a mezbûre Fâtıma’ya izin vermeğin mâ vaka‘a bi’t-taleb ketb olundu. Fî 27 min-Cemâziyelevvel sene 1116. Şuhûdü’l-hâl: Abdullah Ağa b. ( ), el-Hâc Ali kavukçu, Kefe kağılgası Receb Ağa, el-Hâc Selim kapıcı-yı saray, Ömer Ağa kapıcı-yı saray, Ahmed Çelebi b. Abdurrahman, Abdurrahman Bey b. Şaban, Ahmed Bey Sarrâc.