Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 401 Hüküm no: 402 Orijinal metin no: [95a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey’in, İbrahim Beşe’nin elinde bulunan kölesi Yusuf’un sahibine teslim edilmesi Vilâyet-i Rumeli’nde Şumnu kazâsına tâbi‘ Söğütlü nâm karye ahâlîsinden bâ‘isü’l-kitâb Ahmed Bey b. Ali nâm kimesne mahmiye-i İstanbul’da meclis-i şer‘-i hatîrde zikri âtî gulâma âbık olmak bi’l-izni’ş-şer‘î vâzı‘ü’l-yed olan İbrahim Beşe b. Mehmed nâm kimesne mahzarında üzerine da‘vâ ve takrîr-i kelâm edip işbu orta boylu, açık kaşlı, gök gözlü Rusiyyü’l-asl müslimü’l-mille Yusuf nâm şâb-ı emredi bundan akdem gāib ani’l-meclis İsmail Hoca nâm kimesneden abd-i memlûkü olmak üzere yetmiş üç guruş semen-i medfû‘a iştirâ ve kabz edip yedimde iken târîh-i kitâbdan on dört ay mukaddem mevsûf-ı mezbûr Yusuf mülkümden ibâk edip hâlâ mezbûr İbrahim Beşe yedinde bulup bi’l-istihkāk taleb eylediğimde bana teslîmden imtinâ‘ eder, suâl olunsun dedikde, [95b] gıbbe’s-suâl mezbûr İbrahim Beşe cevâbında fi’l-hakīka mevsûf-ı mezbûr Yusuf’a ber-vech-i muharrer vaz‘-ı yedini ikrâr lâkin müdde‘î-i mezbûrun vech-i meşrûh üzere müdde‘âsını inkâr edicek, müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden zikr olunan Söğütlü nâm karye ahâlîlerinden Ahmed b. Murtaza ve Ömer b. Mürüvvet nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka işbu mevsûf-ı mezbûr Yusuf müdde‘î-i mezbûr Ahmed Bey’in abd-i memlûkü olduğu hâlde târîh-i kitâbdan on dört ay mukaddem mülkünden ibâk eyledi, müdde‘î-i mezbûr için mevsûf-ı mezbûr Yusuf’u merkūm İbrahim Beşe’den bi’l-istihkāk hakk-ı taleb ve ahz vardır biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra müdde‘î-i mezbûr tahlîf-i şer‘î ile tahlîf olunup mûcebince mevsûf-ı mezbûr Yusuf’u mâliki olan müdde‘î-i mezbûr Ahmed Bey’e teslîme mezbûr İbrahim Beşe’ye tenbîh birle mâ vaka‘a bi’t-taleb ketb olundu. Fi’l-yevmi’s-sânî min-Cumâdelâhire sene sitte aşere ve mi’e ba‘de elf. Şuhûdü’l-hâl: Mehmed Efendi b. Ahmed, İsmail Efendi el-kâtib, Ömer Efendi b. Ali, el-Hâc Yusuf b. Osman.