Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 404 Hüküm no: 406 Orijinal metin no: [96b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safer v. Kirkor’un, Saltana bt. Markar aleyhindeki ev davasının reddedilmesi Sofçu tâifesinden Safer v. Kirkor nâm Ermeni mahmiye-i İstanbul’da meclis-i şer‘de merhûm İbrahim Efendi binâ eylediği mescid-i şerîf evkāfından olup mahmiye-i mezbûre hısnı ebvâbından Cibâli kapısı hâricinde vâki‘ bir tarafdan Apostol v. Manol nâm zimmî menzili ve bir tarafdan Eskici Yunus Beşe Vakfı ve bir tarafdan Kürkçü Apostol nâm zimmî mülkü ve taraf-ı râbiden tarîk-i âm ile mahdûd bir bâb fevkānî oda ve bir sofa ve tahtânî bir bâb oda ve bir attâr dükkânı ve kenîf ve bir mikdâr havluyu müştemil vakıf menzile izn-i mütevellî ve icâreteyn-i ma‘lûmeteyn ile mutasarrıfe olan râfi‘atü hâze’l-vesîka Saltana bt. Markar nâm Ermeniye muvâcehesinde üzerine da‘vâ ve takrîr-i kelâm edip işbu merkūme Saltana bana kızımı tezevvüc eyle mutasarrıfe olduğum menzil-i mahdûd-ı mezkûrun nısfını sana ferâğ ve tefvîz edeyim deyü va‘ad etmekle ben dahi va‘adine binâen kızını tezevvüc ve duhûl etmişidim. Hâlâ merkūme Saltana menzil-i mezbûrun nısfını bana ferâğ ve tefvîzden imtinâ‘ eder suâl olunup takrîri tahrîr ve menzil-i mezbûrun nısfını bana ferâğ ve tefvîz etmek üzere kıbel-i şer‘den tenbîh olunmak matlûbumdur dedikde, merkūm Safer’in takrîr-i meşrûhu üzere mücerred va‘ad ile şer‘an bir nesne lâzım gelmeyip merkūme Saltana’ya suâl dahi teveccüh etmemeğin merkūm Sefer bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-hâmis min-Cemâziyelâhire li-sene sitte aşere ve mi’e ve elf. Şuhûdü’l-hâl: Ali Efendi b. Ahmed, el-Hâc Mehmed Efendi b. Ahmed, İsmail Efendi b. el-Hâc Siyavuş, Mehmed Efendi el-kâtib, Mehmed Efendi el-kādî, Ahmed Efendi el-kādı.