Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 121 Hüküm no: 128 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Toros v. Aznavur’un tarla ve bağlarını sattığı Vilâyet-i Anadolu’da Çemişgezek kazâsına tâbi‘ Varnik nâm karye ahâlîsinden Toros v. Aznavur nâm Ermeni mahfil-i şer‘-i şerîfde işbu sâhibü’l-kitâb Ali b. Abdülvehhab nâm kimesne muvâcehesinde ikrâr-ı tâm ve bast-ı merâm kılıp karye-i mersûmede vâki‘ bir tarafdan Bektaş Beşe mülkü ve bir tarafdan Hasan Beşe mülkü ve bir tarafdan kendi âhar mülküm, bir tarafdan dahi tarîk-i âm ile mahdûd ve mümtâz olan arsa-yı hâliyeyi ve arsa-yı mezbûre kurbünde mülk bostan yerimi ve yine arsa-yı mezbûre kurbünde ma‘lûmü’l-hudûd taşlık bağı demekle ma‘rûf bir kıt‘a bağımı safka-i vâhide ile yirmi yedi guruşa mezbûr Ali’ye bey‘-i bâtt-ı sahîh-i şer‘î ile bey‘ ol dahi iştirâ ve kabûl eyledikden sonra yine karye-i mezbûre sınırı dâhilinde Harre demekle ma‘rûf mevzi‘de vâki‘ ma‘lûmü’l-hudûd bir kıt‘a tarla ve Gürle nâm mevzi‘de vâki‘ bir kıt‘a tarlamı yine karye-i mezbûre hudûdu dâhilinde lede’l-ahâlî ve’l-cîrân ma‘lûmü’l-hudûd bir kıt‘a tarla [ve] zikri sebk eden tarlalarımın dahi hakk-ı tasarrufunu sâhib-i arz ma‘rifetiyle yirmi beş guruş bedel mukābelesinde ferağ ve tefvîz ol dahi tefevvüz ve kabûl eyledikden sonra semen-i mezbûr ile bedel-i merkūm cem‘an elli iki guruşu mezbûr Ali yedinden ahz ü istîfâ edip zikr olunan menzil yeri ve bağ ve bostan yeri ve tarlaları mahallinde kabz ve tesellüm [ve] teslît eyledim, hasbe-mâ yürîd mutasarrıf olsun dedikde gıbbe’t-tasdîkı’ş-şer‘iyye mâ-vaka‘a bi’t-taleb ketb ü sebt olundu. Fi’l-yevmi’s-sâbi‘ aşer min-Zilka‘deti’l-harâm li-sene selâse ve sittin ve elf. Şuhûdü’l-hâl: Bali Beşe b. Mehmed Ağa, Sefer Bey b. Abdullah, Ebûbekir Çelebi b. Mehmed Ağa, Hasan Beşe b. Abdullah, Hasan Çelebi b. Kanber ve gayruhum mine’l-huzzâr.