Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 122 Hüküm no: 129 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Paşa’nın el-Hâc Mehmed Ağa’ya borcu olduğu Husûs-ı âti’z-zikrin mahallinde ketb ü tahrîri iltimâs olunmağın küttâb-ı mahkemeden mevlânâ Mehmed Efendi b. el-Hâc Mustafa irsâl olunup ol dahi zeyl-i kitâbda isimleri mastûr olan Müslimîn ile kasaba-i Tophane’de İlyas Çelebi Mahallesi’nde sâkin olan işbu sâhibü’l-kitâb el-Hâc Mehmed Ağa’nın mahmiye-i İstanbul’da Balkapanı’nda taht-ı icâresinde olan odaya varıp akd-i meclis-i şer‘-i şerîf olundukda hâlâ Habeş beylerbeyisi olan fahrü’l-emâsil ve’l-ekârim Mustafa Paşa b. Hasan meclis-i mezbûrda merkūm el-Hâc Mehmed Ağa muvâcehesinde bi’t-tav‘i’s-sâf ikrâr u i‘tirâf edip târîh-i kitâbdan iki gün tamamına müeccel ve mev‘ûd mezbûr el-Hâc Mehmed Ağa’ya deyn-i şer‘îden on iki bin esedî guruş ki tekîden li’l-asl nısfı altı bin esedî guruş olur zimmetimde deynim olup ecel-i mezbûr elli gün tamamında zikr olunan on iki bin esedî guruş edâsı lâzım ve kazâsı vâcib deynimdir dedikde gıbbe’t-tasdîkı’ş-şer‘î mûmâ-ileyh Mustafa Paşa’nın li-ebeveyn karındaşı Bostanî İbrahim Bey ve kethüdâları Ahmed Ağa b. Süleyman meblağ-ı mezbûr on iki bin esedî guruşun cümlesine herbiri emr ve kabûlü hâviye kefâlet ile kefîl bi’l-mâl olmağın vâki‘ hâli mevlânâ-yı mezbûr mahallinde tahrîr ve alâ-vukū‘ihî meclis-i şer‘de inhâ ve takrîr etmeğin mâ-hüve’l-vâki‘ bi’t-taleb sebt ü ketb olundu. Fi’l-yevmi’s-sâmin aşer min-Zilka‘deti’l-harâm min-şühûr li-sene selâse ve sittin ve elf. Şuhûdü’l-hâl: Veli Ağa b. Abdi el-cündî, el-Hâc Mustafa el-bevvâbü’s-sultânî, el-Hâc Nimetullah el-cündî, Hasan b. Abdullah tâbi‘-i Nimetullah, el-Hâc Mustafa et-Tâcir ve gayruhum mine’l-huzzâr.