Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 122 Hüküm no: 130 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Yusuf’un Halil Beşe’ye borcunu ödemesi Mahmiye-i İstanbul’da Zindânkapısı dâhilinde ketenci tâifesinden işbu râfi‘u’l-kitâb Halil Beşe b. Mehmed nâm kimesne meclis-i şer‘-i hatîr-i lâzımü’t-tevkīrde Hasan b. Yusuf nâm kimesne muvâcehesinde üzerine da‘vâ edip mezbûr Hasan zimmetinde yedimden müşterâ ve makbûz beynimizde kıymet ve mikdârı ma‘lûm keten bahâsından ba‘de külli hesâb on dokuz bin dokuz yüz akçe hakkım vardır, suâl olunup alıverilmek murâdımdır dedikde gıbbe’s-suâl mezbûr Hasan cevâbında fi’l-vâki‘ müdde‘î-i mezbûr Halil Beşe’ye vech-i muharrer üzere zimmetimde kıymet ve mikdârı ma‘lûm keten bahâsından ba‘de külli hesâb on dokuz bin dokuz yüz akçe lâzımü’l-edâ ve vâcibü’l-kazâ deynim vardır deyü ikrâr u i‘tirâf etmeğin ikrârı mûcebince meblağ-ı mezbûru müdde‘î-i mezbûr Halil Beşe’ye edâ ve teslîme mezbûr Hasan’a tenbîh olunup mâ-vaka‘a bi’t-taleb ketb olundu. Fi’l-yevmi’s-sâdis aşer min-Zilka‘deti’ş-şerîfe li-sene selâse ve sittin ve elf. Şuhûdü’l-hâl: el-Hâc Himmet b. Musa, Receb b. Hasan, Ali Beşe b. Abdullah, Hüseyin b. Abdullah, İbrahim Çelebi b. Davud, Pîrî Beşe b. Hüseyin, Ali Bey b. Mehmed, Kulaksız (...) ve gayruhum.