Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 123 Hüküm no: 131 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kepenekçi Sinan Efendi Mahallesi’ndeki iki evin Vâlide Sultan Vakfı için satın alındığı Aliyyetü’z-zât melekiyyetü’s-sıfât tâcü’l-mestûrât Vâlide Sultan -dâmet ismetuhâ- hazretlerinin kethüdâları olan umdetü’l-emâcid ve’l-ekârim Mehmed b. Ali Ağa’nın mahmiye-i İstanbul’da Kepenekçi Sinan Efendi Mahallesi’nde vâki‘ menzile bi’t-taleb irsâl olunan mevlânâ Mehmed Efendi el-Kādı zeyl-i kitâbda isimleri mastûr olan Müslimîn ile varıp akd-i meclis-i şer‘-i şerîf olundukda mezbûr Sinan Efendi mersûmun evlâdından olup vakfiye-i ma‘mûlün-bihâsında tasrîh olunduğu üzere ber-vech-i meşrûtiyet mütevellî ve nâzır olan umdetü’l-ulemâ ve’l-mevâlî Merhabazâde Ahmed Efendi meclis-i mezbûrda merkūm Mehmed Ağa mahzarında ikrâr-ı tâm ve bast-ı merâm edip vakf-ı mezbûrda olup bir tarafdan menzil-i mersûm ve iki tarafdan vakf-ı mersûm ve bir tarafdan ba‘zan Koyunzâde Mehmed Efendi ve ba‘zan mi‘mâr-ı sâbık Kasım Ağa mülkleri ile mahdûd olup Abraham v. Bali ve Yohan v. Yasef ve Mosi nâm Yahûdilerden tefevvüz edip tûlen on sekiz buçuk zirâ‘ arzan on üç zirâ‘ bi-hesâb-ı şatrancî iki yüz kırk zirâ‘ arsası olan menzili ve yine vakf-ı mezbûrda ma‘lûmü’l-hudûd on beş bâb oda ve havluyu müştemil olan Yahûdi hânenin mutasarrıflarından izn-i mütevellî ile tefevvüz eylediği sekiz bâb oda ve yedimde olan keşf hüccetinde tafsîl olunduğu üzere altmış dört zirâ‘ havluda otuz dört zirâ‘ arsayı mukāta‘a ile ahza tâlib olup cânib-i vakıfda dahi mesârif-i lâzımeye müsâ‘ade olmayıp her vechile enfa‘ olmağın mezbûr Mehmed Ağa yedinden vakf-ı mezbûr için üç yüz elli guruşa ahz u kabz edip ve her senede vakıf için bin beş yüz akçe mukāta‘a vechi üzere def‘ [ve] teslîm etmek için ve mülkiyet üzere binâya izin verilip vech-i muharrer üzere yedine tezkire vermişimdir dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ve alâ-vukū‘ihî meclis-i şer‘de inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-ışrîn min-Zilka‘deti’ş-şerîfe li-sene selâse ve sittin ve elf. Şuhûdü’l-hâl: Seyyid Hasan Efendi el-İmâm, Sefer Ağa b. Abdullah el-Müteferrika, Fahrü’l-kuzât Mehmed Efendi, Fahrü’l-eimme Hacı Efendi, Korucu Mehmed Bey, Fahrü’l-müderrisîn İbrahim Efendi, Terekeci İbrahim, Yusuf Bey el-cündî, Ahmed Ağa el-cündî, Mehmed Ağa b. Ahmed ve gayruhum.