Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 124 Hüküm no: 132 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hasan’ın el-Hâc Osman Ağa’dan alacağı konusunda anlaşmaya vardıkları Vilâyet-i Anadolu’da Kastamonu sancağında Küre-i Nühas kasabasında Müderris Mahallesi sâkinlerinden Mehmed b. Hasan nâm kimesne meclis-i şer‘-i hatîr-i lâzımü’t-tevkīrde yine mahalle-i mezbûre sâkinlerinden işbu râfi‘u’l-kitâb İmâmzâde demekle ma‘rûf el-Hâc Osman Ağa b. el-Hâc Ahmed Ağa muvâcehesinde ikrâr ve takrîr-i kelâm edip mezbûr el-Hâc Osman Ağa zimmetinde deyn-i şer‘îden yedi bin akçe ve dört bin akçe kıymetli bir kürk ve iki bin beş yüz akçe beynimizde ma‘lûm sâir husûs için ve kıymeti beynimizde ma‘lûm dokuz batman cedîd bakır ve elli kile arpa ve üç aded tiftik kebesi ve bir velencemi da‘vâ ve taleb etmekle ol dahi inkâr edip beynimizde husûmet ve nizâ‘ vâkı‘a olmuş idi. El-hâletü hâzihî muslihûn tavassut edip husûs-ı mezbûr için beni yirmi batman bakır ile Küçük Yusuf ve Tatar Köle nâm iki re’s gulâmlar üzerine sulh ettiklerinde ben dahi sulh-i mezbûru kabûl ve bedel-i sulh yirmi batman bakır ile iki re’s gulâmları kasaba-i mezbûreye varılıp kırk gün tamamına değin teslîm etmek üzere te’cîl eylemişimdir. Vech-i muharrer üzere bedel-i sulh olan gulâmlar ile yirmi batman bakırı mezbûrdan kabz ve tesellüm eylediğimde vechen mine’l-vücûh da‘vâ ve nizâ‘ım kalmaz dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Zilka‘deti’ş-şerîfe li-sene selâse ve sittin ve elf. Şuhûdü’l-hâl: Salih Çelebi b. Mustafa, el-Hâc Mehmed b. Mustafa, Bayram Bey b. Abdullah, el-Hâc Hasan b. Ya‘kub, el-Hâc Mehmed b. Receb, Mehmed b. İbrahim ve gayruhum mine’l-huzzâr.