Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 124 Hüküm no: 133 Orijinal metin no: [20b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsak v. Avraham’ın el-Hâc Yusuf’a borcu olduğu Mahmiye-i İstanbul’da Odunkapısı hâricinde olan Pazarcı tâifesinden işbu sâhibü’l-kitâb el-Hâc Yusuf b. Abdullah nâm kimesne mahfil-i kazâda mahmiye-i mezbûrede Kedüz cemâ‘atinden İsak v. Avraham nâm Yahûdi muvâcehesinde üzerine da‘vâ ve takrîr-i kelâm edip mezbûr İsak zimmetinde yedimden müşterâ ve makbûz kıymet ve mikdârı beynimizde ilm-i şer‘î ile ma‘lûm gön semeninden râyic fi’l-vakt iki bin altı yüz altı akçe hakkım olup meblağ-ı merkūmu taleb ettiğimde bana edâ ve teslîmde ta‘allül ve nizâ‘ eder, hâlâ suâl olunup alıverilmesi matlûbumdur dedikde gıbbe’s-suâl mezbûr İsak cevâbında fi’l-hakīka müdde‘î-i mezbûra cihet-i merkūmeden meblağ-ı merkūm iki bin altı yüz elli akçe zimmetimde vâcibü’l-edâ deynimdir deyü tav‘an ikrâr u i‘tirâf etmeğin mûcebince meblağ-ı merkūmu müdde‘î-i mezbûra edâ ve îfâya merkūm İsak’a tenbîh olunup mâ-hüve’l-vâki‘ bi’t-taleb ketb ü sebt olundu. Fi’l-yevmi’l-hâmis ve’l-ışrîn min-Zilka‘deti’ş-şerîfe li-sene selâse ve sittin ve elf. Şuhûdü’l-hâl: Rıdvan Beşe b. Abdullah, el-Hâc Şa‘ban b. Ahmed, Ramazan Beşe b. Yusuf, Pîrî Beşe b. Hüseyin ve gayruhum mine’l-huzzâr.