Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 125 Hüküm no: 134 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Aston’un el-Hâc Yusuf’a borcu olduğu Tüccâr tâifesinden işbu sâhibü’l-kitâb el-Hâc Yusuf b. Abdullah nâm kimesne mahfil-i şer‘-i şerîfde Yamandi v. Aston nâm zimmî muvâcehesinde üzerine da‘vâ edip mezbûr Yamandi zimmetinde vakıyyesi on yedişer akçeye olmak üzere müşterâ ve makbûz olan kırk üç kantar on yedi lidre mum yağı bahâsından otuz bir bin altı yüz altmış akçe hakkım olup meblağ-ı mezbûrdan bir def‘a on bir bin akçe ve bir def‘a beş bin akçe ve bir def‘a bin akçe bir def‘a dahi bin yüz akçe ki cem‘an on sekiz bin yüz akçeyi ahz u kabz edip bâkī on üç [bin] beş yüz altmış üç akçe hakkımı taleb ederim dedikde gıbbe’l-istintak mezbûr Yamandi cevâbında fi’l-hakīka vech-i muharrer üzere mum yağı semeninden müdde‘î-i mezbûra on üç bin beş yüz altmış üç [akçe] deynim vardır deyip tav‘an ikrâr u i‘tirâf eyledikde edâsına tenbîh-birle mâ-vaka‘a kayd şüd. Fi’l-hâmis ve’l-ışrîn min-Zilka‘de sene selâse ve sittin ve elf. Şuhûdü’l-hâl: Mehmed Çavuş el-müezzin, Ahmed b. Mehmed, Mehmed Beşe b. Abdi, el-Hâc İsa b. İsmail ve gayruhum.