Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 126 Hüküm no: 136 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın cariyesini azat ettiği Mahrûse-i Galata mahallâtından Müeyyedzâde Mahallesi’nde sâkin Ahmed Ağa b. Abdurrahman nâm kimesne tarafından husûs-ı âti’z-zikre vekîl olup Yahya Bey b. Abdullah el-cündî ve Osma[n] Ağa b. Abdullah el-Bostanî şehâdetleriyle vekâleti sâbite olan oğlu Osman Ağa nâm kimesne mahfil-i şer‘-i şerîfde müvekkil-i mezbûra rıkkını mu‘terife olan açık kaşlı, ela gözlü, uzun boylu, Gürciyyetü’l-asl hâfızetü hâze’l-kitâb Gülgül bt. Abdullah nâm câriye-i memlûkesi muvâcehesinde bi’l-vekâle ikrâr ve takrîr-i kelâm edip babam müvekkil-i mezbûr memlûkesi mevsûfe-i mezbûreyi târîh-i kitâbdan üç sene mukaddem hasbeten lillâhi te‘âlâ ve taleben li-merzâtihî “Yevme yestazıllü’l-mer’u tahte zılli sadakātihî ve ragabeten bi-mâ-kāle’n-nebiyyü’l-muhtâr: Men a‘taka’llâhü mümineten a‘taka’llâhu te‘âlâ bi-külli udvin minhâ udven minhu mine’n-nâr” âzâd ve i‘tâk ve kayd-ı rıkdan ıtlâk eyleyip mezbûre Gülgül sâir harâir-i asliyyât gibi hürre olup üzerinde hakk-ı velâdan gayrı hakkı kalmamışdır dedikde mâ-hüve’l-vâki‘ bi’t-taleb ketb ü sebt olundu. Fi’l-yevmi’r-râbi‘ ve’l-ışrîn min-Zilka‘deti’ş-şerîfe li-sene selâse ve sittin ve elf. Şuhûdü’l-hâl: Salih Çelebi b. Mustafa, el-Hâc Mustafa Çelebi b. Abdullah, Hasan Çelebi b. Kanber, Rıdvan Beşe b. Abdullah ve gayruhum mine’l-huzzâr.