Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 128 Hüküm no: 139 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aslen Zeytun’un Kozca köyünden olup İstanbul’da vefât eden Abdullah b. Bahtiyar’ın mallarının vârislerine verilmesi Vilâyet-i Anadolu’da Zeytun kazâsına tâbi‘ Kozca nâm karye ahâlîsinden işbu bâ‘isü’l-kitâb Mustafa Çelebi b. Ali Efendi asâleten ve Mustafa b. Bali ve Süleyman b. Kasım taraflarından vech-i âtî üzere vekâlet iddi‘â etmeğin vekâleten mahfil-i kazâda karye-i mezbûre ahâlîsinden olup mahmiye-i İstanbul’da Elvanzâde Mahallesi’nde mütemekkin iken bundan akdem vefât eden Abdullah b. Bahtiyar’ın sulbiye sagīre kızı Meryem’in tesviye-i umûruna vasiyy-i muhtârı olmağla muhallefâtına vâzı‘u’l-yed olan Ahmed Beşe b. Mustafa mahzarında üzerine da‘vâ edip müteveffâ-i mezbûrun babası merkūm Bahtiyar benim babam merkūm Ali Efendi ve müvekkilân-ı merkūmânın babaları mezkûrân Bali ve Kasım li-ebeveyn karındaşlar olup babaları ismi Resül Fakih ve anaları ismi Matlube bt. el-Hâc Turhan ve maskat-ı re’sleri karye-i mezbûre olmağla ben ve müvekkilân-ı mezbûrân müteveffâ-i mezbûrun li-ebeveyn ammileri oğulları olup verâseti kızı mezbûre Meryem ile usûbet-i nesebiye cihetinden bana ve müvekkilân-ı merkūmâna münhasıra olup muhallefâtından bize isâbet eden nısf hisse-i şer‘iyyelerimizi asâlet ve vekâletim hasebiyle bana edâ ve teslîm etmek üzere merkūm Ahmed Beşe’ye tenbîh olunmak matlûbumdur dedikde gıbbe’s-suâl mezbûr Ahmed Beşe cevâbında vech-i muharrer üzere müteveffâ-i mezbûrun muhallefâtına vaz‘-ı yed eylediğini ikrâr ve mezbûrân Mustafa ve Süleyman taraflarından müdde‘î-i mezbûrun vekâletini ve verâsetlerini inkâr etmeğin müdde‘î-i mezbûr Mustafa Çelebi’den da‘vâsını mübeyyine beyyine taleb olundukda karye-i mezbûre ahâlîsiden Mehmed Çelebi b. Ali Efendi ve Mehmed Sofu b. Hüseyin nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-i mezbûrun babası merkūm Bahtiyar müdde‘î-i mezbûr Mustafa Çelebi’nin babası merkūm Ali Efendi ve mezbûr Mustafa’nın babası mezbûr Bali ve mersûm Süleyman’ın babası merkūm Kasım li-ebeveyn karındaşlar olup babaları ismi mezbûr Resül Fakih ve anaları ismi mezbûre Matlube bt. el-Hâc Turhan ve maskat-ı re’sleri karye-i mezbûredir, müteveffâ-i mezbûrun verâseti sulbiye kızı sagīre-i mezbûre Meryem ile usûbet-i nesebiye cihetinden müdde‘î-i mezbûr Mustafa Çelebi’ye ve mezbûrân Mustafa ve Süleyman’a münhasıradır, zâhirde bunlardan gayrı vâris-i ma‘rûfu olduğu ma‘lûmumuz değildir bu husûsa biz şâhidleriz şehâdet dahi ederiz deyü herbiri edâ-yı şehâdet-i şer‘iyye edip ve Mehmed Çelebi b. Mustafa ve Mehmed Bey b. Pirkulu nâm kimesne dahi hâzırân olup isre’l-istişhâd fi’l-hakīka merkūmân Mustafa b. Bali ve Süleyman b. Kasım mûrisleri müteveffâ-i mezbûrun muhallefâtından kendilere âid olan hisse-i şer‘iyyelerini vaz‘-ı yed edenlerden da‘vâ ve talebe ve ahz u kabz ve kendilere îsâle ve lede’l-hükkâm kabz ve îsâle mütevakkıf olan umûra müdde‘î-i mezbûr Mustafa Çelebi’yi bizim huzûrumuzda taraflarından vekîl ve nâib-i menâb nasb ve ta‘yîn edip ol dahi vekâlet-i mezbûreyi kabûl ve merâsimini edâya müte‘ahhid oldu, bu husûsa biz şâhidleriz şehâdet dahi ederiz deyü herbiri edâ-yı şehâdet-i şer‘iyye eylediklerinde şâhidûn-ı mezbûrûnun şehâdetleri ba‘de’t-ta‘dîl ve’t-tezkiye makbûle olmağın mûcebince müteveffâ-i mezbûrun muhallefâtından müdde‘î-i mezbûre ve müvekkilân-ı merkūmâna isâbet eden hisse-i şer‘iyyelerini edâ ve teslîm etmek üzere merkūm Ahmed Beşe’ye tenbîh olunup mâ-hüve’l-vâki‘ gıbbe’t-taleb ketb olundu. Fi’l-yevmi’l-sâlis min-Zilhicceti’ş-şerîfe li-sene selâse ve sittin ve elf. Şuhûdü’l-hâl: el-Hâc Mustafa b. Şa‘ban, İsmail Çelebi b. el-Hâc Rıdvan, el-Hâc Yusuf b. Abdullah, Mehmed Çelebi b. el-Hâc Ebûbekir, Abdüllatif Çelebi b. Mehmed, el-Hâc Ebîbekir b. Ömer ve gayruhum mine’l-huzzâr.