Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 129 Hüküm no: 140 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin mudarebe yoluyla verdiği paranın çalındığı Mumcu tâifesinden Mehmed Çelebi b. Ali mahfil-i kazâda sefîne reislerinden işbu bâ‘isü’l-kitâb Yorgi v. Bagon nâm zimmîyi ihzâr, üzerine da‘vâ edip mezbûr Yorgi târîh-i kitâbdan üç sene mukaddem mudârebe vechi ile sekiz bin fıddî akçeyi def‘ ve teslîm edip ol dahi minvâl-i muharrer üzere kabz ve tesellüm eyledikden sonra mezbûr Yorgi’ye ol meblağı medîne-i İzmir’de i‘mâl eyle deyü tahsîs etmiş iken mezbûr Yorgi meblağ-ı mezbûru gayrı yerlerde i‘mâl edip ba‘dehû İstanbul’a gelirken sefînesini harbî kâfir alıp meblağ-ı mezbûru te‘addîsi sebebiyle helâk etmişdir suâl olunup tazmîn ettirilmek matlûbumdur dedikde mezbûr Yorgi müdde‘î-i mezbûrun ol vech üzere tahsîs eylediğini inkâr edicek müdde‘î-i mezbûrdan da‘vâsına mutâbık beyyine taleb olundukda ikāmet-i beyyineden ızhâr-ı acz ve istihlâf ettikde mezbûr Yorgi’ye ol vech üzere tahsîs edip meblağ-ı mezbûru te‘addîsi sebebiyle helâk olmadığına cânib-i şer‘den yemîn teklîf olundukda ol dahi hasebi’l-mesûl half bi’llâhillezî enzele’l-İncîle alâ-Îsa -aleyhi’s-selâm- edip mûcebince müdde‘îyi ta‘arruzdan men‘-birle kayd şüd. Fi’t-târîhi’l-mezbûr. Şuhûdü’l-hâl: Hasan Çelebi [b.] İbrahim, İbrahim b. Davud, Pîrî Hüseyin b. ( ), Rıdvan b. Abdullah ve gayruhum.