Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 130 Hüküm no: 141 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müslüman olan Hasan Beşe’nin bağ ve tarlalarını oğlu Serkis’e sattığı Vilâyet-i Anadolu’da Eğin kazâsına tâbi‘ İbiç nâm karye ahâlîsinden olup şeref-i islâm ile müşerref olan Hasan Beşe b. Abdullah nâm kimesne mahfil-i kazâda sulbî oğlu Serkis nâm Ermeni muvâcehesinde ikrâr ve takrîr-i kelâm edip karye-i merkūmede vâki‘ bir tarafdan Araken nâm Ermeni mülkü ve bir tarafdan Cerik nâm Ermeni mülkü ve bir tarafdan tarîk-i âm ile mahdûd olan üç bâb tahtânî odaları hâvî menzilimi ve yine karye-i mersûme sınırı dâhilinde Yazı nâm mevzi‘de vâki‘ bir tarafdan Kiki nâm Ermeni bağı ve bir tarafdan Kesdek nâm Ermeni bağı ve tarafeynden tarîk-i âm ile mahdûd bağını mezbûr Serkis’e tarafeynden îcâb ve kabûlü hâvî bey‘-i kat‘î ile safka-i vâhidede altmış guruşa bey‘ ol dahi iştirâ ve kabûl eyleyip ve yine karye-i merkūme sınırı dâhilinde mevâzi‘-i adîdede vâki‘ lede’l-ahâlî ve’l-cîrân ma‘lûmü’l-hudûd tarlalarımın hakk-ı tasarrufunu sâhib-i arz ma‘rifetiyle mezbûr Serkis’e yirmi guruş bedel mukābelesinde ferağ ve tefvîz ol dahi tefevvüz ve kabûl eyledikden sonra semen-i mezbûr altmış guruş ile bedel-i mezbûr yirmi guruş ki cem‘an seksen guruşu merkūm Serkis yedinden bi’t-tamam ahz u kabz edip zikr olunan menzil ve bağ ve tarlaları mahallinde kabz ve tasarrufa merkūm Serkis’i taslît eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis min-Zilhicceti’ş-şerîfe li-sene selâse ve sittin ve elf. Şuhûdü’l-hâl: Süleyman Beşe b. Ya‘kub, Hasan Bey b. Zülfikār, Abdurrahman Beşe b. Abdullah, Hasan Bey b. Abdullah, Hasan Beşe b. Abdullah ve gayruhum mine’l-huzzâr.