Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 130 Hüküm no: 142 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Hasan’ın alacağına Pave bt. Yasef’in kefil olduğu Kasaba-i Kasımpaşa’da Küçük Piyale Paşa Mahallesi’nde sâkin işbu bâ‘isü’l-kitâb el-Hâc Hasan b. Abdullah nâm kimesne meclis-i şer‘-i hatîr-i lâzımü’t-tevkīrde Pave bt. Yasef nâm Yahûdiye muvâcehesinde üzerine da‘vâ ve takrîr-i kelâm edip zevci gāib ani’l-meclis İsak zimmetinde yedimden müşterâ ve makbûz her re’si dokuzar yü[z] onar akçeye olmak üzere yirmi beş inek bahâsından yirmi iki bin iki yüz elli akçe hakkım olup meblağ-ı mezbûrdan yedi yüz elli akçesini ahz u kabz edip zimmetinde yirmi bir bin beş yüz akçe hakkım kalıp medyûn-ı mezbûrun nefsine ve târîh-i kitâba gelince edâ eylemedikde zimmetine lâzım gelen meblağa emriyle zevcesi mezbûre Pave kefîl olmuşdu, hâlâ ecel-i mezbûr tamam olup meblağ-ı mezbûru medyûn-ı merkūm îfâ etmemeğin zevcesi kefîl-i mezbûrdan taleb ederim dedikde gıbbe’l-istintak mezbûre Pave fi’l-hakīka zevcim mezbûrun nefsine ve zimmetinde olan meblağı îfâ eylemedikde ben zâmin olmak üzere emriyle kefîl olmuş idim. Lâkin ecel-i mezbûr tamamına üç gün bâkī kalıp ve meblağ-ı mezbûrun mikdârı ma‘lûmum değildir dedikde mezbûr el-Hâc Hasan ecel-i mezbûr tamamına üç gün bâkī olduğunu mu‘terif oldukdan sonra meblağ-ı müdde‘î yirmi bir bin beş yüz akçe olduğuna beyyine taleb olundukda ityân-ı beyyine için istimhâl etmeğin mehl-i şer‘î verilip mâ-vaka‘a bi’t-taleb ketb olundu. Fî-gurre-i Zilhicceti’ş-şerîfe li-sene selâse ve sittin ve elf. Şuhûdü’l-hâl: Mehmed Çelebi b. Hüseyin, Rıdvan b. Abdullah, Ali Bey b. Mehmed, Hüseyin Beşe b. Hasan ve gayruhum mine’l-huzzâr.