Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 131 Hüküm no: 143 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bender-i Reşid kasabasından el-Hâc Süleyman’ın İstanbul’daki gelirlerini vekilleri elinden aldığı Diyâr-ı Arab’da Bender-i Reşid kasabasında sâkin el-Hâc Süleyman b. Şehabeddin el-Matar tarafından husûs-ı âti’z-zikre vekîli olup vekâleti hasm-ı câhid-i şer‘î mahzarında Mustafa b. Ahmed ve Hüseyin b. Hasan şehâdetleriyle şer‘an sâbite olan karındaşı oğlu Nasıruddin Çelebi b. Seyfullah el-Matir meclis-i şer‘-i hatîr-i lâzımü’t-tevkīrde işbu sâhibü’l-kitâb Mehmed Çelebi b. Ebinnasr muvâcehesinde ikrâr ve takrîr-i kelâm edip bundan akdem müvekkilim mezbûr el-Hâc Süleyman mahmiye-i İstanbul’da Balkapanı’nda vâki‘ bir bâb oda ile mahzen ve Mahrûse-i Galata hâricinde kasaba-i Kasımpaşa’da el-Hâc Ferhad Mahallesi’nde vâki‘ menzilde icârelerini cem‘ ve tahsîl ve kendiye îsâle mezbûr Mehmed Çelebi’yi tarafından vekîl nasb ve ta‘yîn etmişdi, ben dahi mezbûrun bu husûsa vekîli olmağile merkūm Mehmed Çelebi’den makbûzu olan meblağı tefahhus ettiğimde zikr olunan oda icâresinden on bir bin altı yüz doksan akçe ve mahzen ile menzil icârelerinden dokuz bin sekiz yüz on dokuz akçe müvekkil-i merkūma mezbûr Mehmed Çelebi el-Hâc Mansur el-Kasbî yediyle ve bir def‘a üç bin akçe el-Hâc Attâr yediyle irsâl ve yüz seksen kıt‘a guruş kebîr kıymetli iki yan ve beş aded orta Selanik keçeleri Mihalaki reis yediyle irsâl edip üç bin dokuz yüz kırk altı akçe zikri sebk eden oda dâhilinde mahfûz olan sekiz aded ...? tabak-ı sahan ve bir tabak-ı kâse ve bir fağfûrî vasat kâse ve dört aded fağfûrî küçük tabak ve beş aded fağfûrî vasat tabak ve sekiz aded fağfûrî sim kâse ve iki fağfûrî sürâhi ve bir kalay sürâhi ve yedi aded fağfûrî fincân ve bir fağfûrî devât ve yedi aded Ka‘be-i şerîfe bardağı ve bir müsta‘mel sandık ve beynimizde ma‘lûm dört cild kitâb ve zikr olunan hücrenin temessükü ile menzilin hüccetini bana teslîm eyledi, ben dahi meblağ-ı merkūm üç bin dokuz yüz kırk altı akçe ile eşyâ-i mezkûreyi vekâletim hasebiyle ahz u kabz eyledim, mezbûr Mehmed Çelebi üzerinde târîh-i kitâba gelince zikr olunan oda ve hücre ve menzil icârelerinden bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a kayd şüd. Fi’l-yevmi’l-hâdî ve’l-ışrîn li-sene selâse ve sittin ve elf. Şuhûdü’l-hâl: Hafız Efendi el-İmâm, el-Hâc Abdurrahman b. Ahmed, el-Hâc Nimetullah el-Hanbelî, el-Hâc Yusuf b. Selim ve gayruhum.