Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 132 Hüküm no: 144 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeytun kasabasından olup İstanbul’da vefât eden Abdullah Beşe’nin vârisleri arasında sulh sağlanarak malların paylaşıldığı Vilâyet-i Anadolu’da Zeytun kasabasına tâbi‘ Kozca nâm karye ahâlîsinden mahmiye-i İstanbul’da Elvanzâde Mahallesi’nde mütemekkin bundan akdem müteveffâ olan Abdullah Beşe b. Bahtiyar’ın verâseti sulbiye sagīre kızı Meryem ile usûbet-i nesebiye cihetinden vârisleri olan ibn-i ammileri Mustafa Çelebi b. Ali Efendi ve Süleyman b. Kasım ve diğer Mustafa b. Yusuf’a münhasıra olup mezbûr Süleyman tarafından müteveffâ-i mezbûrun muhallefâtından bi-hasebi’l-irsi’ş-şer‘î kendüye intikāl eden hisse-i şer‘iyyesini muhallefât-ı mezbûreye vâzı‘u’l-yed olup sagīre-i mezbûrenin vasiyy-i muhtârı olan Ahmed b. Mustafa nâm kimesneden taleb ve da‘vâ ve sulh ve ibrâ ve ahz u kabz ve îsâl ve kabz ve îsâle mütevakkıf olduğu umûrun cümlesine vekîl olup vekâleti hâlâ Zeytun Kādısı Mustafa Efendi b. Osman kıbelinden vârid imzâ ve hatemiyle mümzâ ve mahtûm târîh-i kitâb senesi Zilka‘deti’ş-şerîfesi evâsıtı târîhiyle müverrah olan nakl-i şer‘î zeylinde beyne’ş-şuhûd isimleri mastûr olan Şa‘ban Bey b. Osman el-cündî ve Mehmed Bey b. Murad el-cündî şehâdetleri ile sâbite olan Murad Bey b. Mustafa mahfil-i şer‘-i şerîfde muhallefât-ı müteveffâ-i mezbûra vâzı‘u’l-yed olan sagīre-i mezbûrenin vasiyy-i muhtârı bâ‘isü’r-rakīm mezbûr Ahmed muvâcehesinde bi’l-vekâle ikrâr u i‘tirâf edip müteveffâ-i mezbûrun terekesinin nısfı bi-hasebi’l-irs kızı mezbûre Meryem’e ve nısf-ı bâkī mezbûrûn Süleyman ve Mustafa Çelebi ve diğer Mustafa’ya intikāl edip vech-i muharrer üzere müvekkil-i mezbûr Süleyman’ın hisse-i şer‘iyyesi için dahi mezbûr yedinden bi-tarîkı’s-sulh beş bin akçe ahz u kabz edip muhallefât-ı mezbûreye müte‘allika âmme-i da‘vâdan mezbûru ibrâ ve ıskāt eyledim, ba‘de’l-yevm mazmûn-ı kitâba muhâlif da‘vâ sudûr ederse lede’l-hükkâmi’l-kirâm ebkāhümu’llâhü te‘âlâ ilâ-yevmi’l-kıyâm istimâ‘ ve ısgā olunmasın dedikde vekîl-i mezbûr Murad Bey minvâl-i muharrer üzere cârî olan kelimâtını dahi mezbûr Ahmed bi’l-muvâcehe tasdîk ve bi’l-müşâfehe tahkīk etmeğin mâ-hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâbi‘ min-Zilhicceti’ş-şerîfe li-sene selâse ve sittin ve elf. Şuhûdü’l-hâl: Mehmed Dede b. Hüseyin, el-Hâc Yusuf b. Abdullah, el-Hâc İsmail b. Rıdvan, el-Hâc Mustafa b. Şa‘ban, Hasan b. Ahmed, Ebûbekir Bey b. Ömer, Mehmed Bey b. Bekir Bey, Ali Bey b. Mehmed, Hüseyin Beşe Çukadâr.