Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 133 Hüküm no: 145 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Yunus ile el-Hâc İbrahim’in Mehmed Çelebi’ye borçları olduğu İşbu sâhibü’l-kitâb Mehmed Çelebi b. Abdülkerim mahfil-i şer‘-i hatîr-i lâzımü’t-tevkīrde el-Hâc Yunus b. el-Hâc Salahaddin ve el-Hâc İbrahim b. Yahya nâm kimesneler muvâcehelerinde üzerlerine da‘vâ edip mezbûrân el-Hâc Yunus ile el-Hâc İbrahim zimmetlerinde cihet-i karz-ı şer‘îden ikişer bin beş yüz akçeden cem‘an beş bin akçe hakkım olup vermede ta‘allül etmeğin suâl olunup alıverilmesi murâdımdır dedikde gıbbe’l-istintak mezbûrân el-Hâc Yunus ve el-Hâc İbrahim cevâblarında fi’l-hakīka müdde‘î-i mezbûr Mehmed Çelebi’ye cihet-i karz-ı şer‘iyyeden herbirimizin iki bin beş yüz akçeden cem‘an beş bin akçe edâsı lâzım deynimiz vardır deyü tav‘an ikrâr u i‘tirâf eylediklerinde ikrârları mûcebince meblağ-ı mezbûr ikişer bin beşer yüz akçeden cem‘an beş bin akçenin edâsı için mezbûrâna tenbîh olunup mâ-vaka‘a bi’t-taleb ketb ü sebt olundu. Fi’l-yevmi’s-sâmin min-Zilhicce sene 1063. Şuhûdü’l-hâl: Hüseyin Beşe Kantarî, Hüseyin Beşe Çukadâr, Hasan Çelebi er-Ressâm, Pîrî Beşe b. Hüseyin ve gayruhum.