Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 134 Hüküm no: 147 Orijinal metin no: [23a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şirmerd adlı hayır sahibinin evlatlarından Sâliha ve Ayşe’nin evlerini el-Hâc Hüseyin b. Abdullah’a sattıkları Mahmiye-i İstanbul’da merhûm Şirmerd nâm sâhibü’l-hayrın evlâdından olup mahmiye-i merkūmeden Hızır Bey Mahallesi’nde sâkineler olan Sâliha ve Âişe bintey Hasan nâm hatunlar taraflarından husûs-ı âti’l-beyânı ikrâra vekîl olup vekâleti hasm-ı câhid-i şer‘î mahzarında mezbûretânın zâtlarını ma‘rifet-i şer‘iyye ile ârifân olan mahalle-i mezbûre ahâlîsinden Resül b. Ramazan ve Ali b. Mustafa şehâdetleri ile şer‘an sâbite olan Mustafa Efendi b. el-Hâc Ali mahfil-i kazâda menzil-i âti’l-beyâna vâzı‘u’l-yed olan işbu bâ‘isü’l-kitâb el-Hâc Hüseyin b. Abdullah mahzarında bi’l-vekâle ikrâr-ı tâm ve takrîr-i kelâm edip yine mahmiye-i mezbûrede Elvanzâde Mahallesi’nde vâki‘ iki tarafı Metrinye mülkleri ve bir tarafı Câbî nâm kimesne mülkü ve bir tarafı tarîk-i hâs ile mahdûd fevkānî ve tahtânî büyût-ı müte‘addideyi ve bi’r-i mâ ve kenîfi ve zât-ı eşcâr-ı müsmire ve gayr-ı müsmire hadîkayı müştemil menzili merhûm-ı mezbûr Şirmerd evvelâ nefsine ba‘dehû oğlunun evlâdına ve evlâd-ı evlâdına zükûren kânû ev inâsen ba‘de’l-inkırâz mahalle imâmına tevliyetini dahi nevbetinde mutasarrıf olanlara vakfedip evlâdından müvekkiletân-ı mezbûretân mutasarrıfeler iken menzil-i mezbûr bundan akdem vâki‘ olan harîkde muhterik olup arsası kaldıkda mezbûre Sâliha’nın dâmâdı İsmail Beşe ol arsayı mezbûretândan senede elli akçe mukāta‘a-i misli ile müvekkiletân-ı mezbûretândan alıp yine onların izni ve kendi malıyla nefsi için müştemilât-ı mezkûreyi binâ edip mutasarrıf iken fevt olup ol binâ sulbî kebîr oğlu İbrahim’e ve sulbiye kebîre kızı Sâliha’ya intikāl etmekle mezbûrân İbrahim ve Sâliha ol binâyı merkūm el-Hâc Hüseyin’e altmış bin nakd râyic fi’l-vakt fıddî akçeye bin altmış iki senesi Zilka‘desi’nde bâtten bey‘ ve teslîm ve arsasını dahi müvekkilâtân-ı mezbûretânın ma‘rifetleri ile ferağ ve tefvîz edip ol dahi minvâl-i muharrer üzere menzil-i mezbûrun binâsını iştirâ ve tesellüm ve arsasını dahi tefevvüz eyledikden sonra semen-i mezbûru tamamen yedinden ahz u kabz eylediler, menzil-i mezbûr merkūm el-Hâc Hüseyin’in mülk-i müşterâsıdır, keyfe mâ yeşâ’ ve yehtâr mutasarrıf olsun, müvekkilâtân-ı merkūmetânın merkūm el-Hâc Hüseyin ile menzil-i mezbûra müte‘allik min-ba‘d da‘vâ ve nizâ‘ları yokdur dedikde gıbbe’t-tasdîk ve’t-taleb mâ-vaka‘a ketb ü sebt olundu. Fi’l-yevmi’s-sâbi‘ min-Zilhicceti’ş-şerîfe li-sene selâse ve sittin ve elf. Şuhûdü’l-hâl: Habib Efendi el-Kādı, Şeyh Mehmed Çelebi b. Musa, Ali Bey b. Mehmed, Hüseyin Beşe b. Hasan Çukadâr, Rıdvan Beşe b. Abdullah ve gayruhum mine’l-huzzâr.