Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 135 Hüküm no: 148 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Raziye bt. Hüseyin’in vârisleri arasındaki davaya sulh bedeli karşılığı son verildiği Mahmiye-i İstanbul’da Samanveren-i atîk Mahallesi’nde sâkine iken bundan akdem vefât eden Raziye bt. Hüseyin nâm hatunun verâseti zevc-i metrûku el-Hâc İlyas b. Abdullah ile li-ebeveyn karındaşı oğlu ve usûbet-i nesebiyye cihetinden vârisi olan İbrahim Bey b. Mehmed nâm kimesneye münhasıra olduğu şer‘an sâbit ve mütehakkık oldukdan sonra merkūm İbrahim Bey tarafından vech-i âtî üzere sulh ve ibrâya vekîl olup vekâleti hasm-ı câhid-i şer‘î mahzarında Bektaş Bey b. Hatır ve Kenan Beşe b. Abdullah şehâdetleri ile şer‘an sâbite olan Havvâ Hatun bt. İsmail meclis-i şer‘-i hatîr-i lâzımü’t-tevkīrde muhallefât-ı müteveffât-ı mezbûreye vâzı‘u’l-yed olan mezbûr el-Hâc İlyas kıbelinden ikrâr-ı âti’l-beyânı tasdîka sâbitü’l-vekâle vekîli olan râfi‘u’l-kitâb el-Hâc Osman b. Hasan nâm kimesne mahzarında bi’l-vekâle ikrâr ve takrîr-i kelâm edip müteveffât-ı mezbûrenin terekesinden müvekkilim merkūm İbrahim Bey’e bi-tarîkı’l-usûbeti’n-nesebiyye isâbet eden hisse-i şer‘iyyesi mukābelesinde alâ-tarîkı’t-tehârüci’ş-şer‘î yüz kıt‘a riyâlî guruş-ı kebîre Müslimûn-ı muslihûn tavassutu ile beynimizde sulh vâki‘ olup ben dahi sulh-i mezbûru kabûl ve bedel-i sulh olan meblağ-ı mezbûru merkūm el-Hâc İlyas yedinden müvekkilim mezbûr için ahz u kabz eyleyip muhallefât-ı müteveffât-ı mezbûreye müte‘allik cemî‘-i de‘âvîden zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm mazmûn-ı kitâba muhâlif mezbûr İlyas’ın üzerine müvekkilim mezbûr İbrahim Bey’den bi’z-zât veyâ bi’l-vâsıta da‘vâ ve nizâ‘ sudûr ve zuhûr ederse lede’l-hükkâmi’l-kirâm makbûle ve mesmû‘a olmaya dedikde, gıbbe’t-tasdîkı’ş-şer‘î mâ-hüve’l-vâki‘ ketb olundu. Fi’l-yevmi’l-ışrîn min-Zilka‘deti’ş-şerîfe li-sene selâse ve sittin ve elf. Şuhûdü’l-hâl: el-Hâc Hasan b. Ca‘fer, Mustafa Efendi İmâm, el-Hâc İsmail b. Hasan, İbrahim b. Hasan, Osman Çelebi b. İskender, Yusuf Halîfe el-müezzin, İbrahim el-müezzin.