Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 136 Hüküm no: 149 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed’in bağını Mehmed Beşe’ye kiraladığı Mahmiye-i Bursa’da Veled-i Harîr Mahallesi’nde sâkin el-Hâc Mehmed b. el-Hâc Hasan mahfil-i kazâda işbu râfi‘u’l-vesîka Mehmed Beşe b. el-Hâc Ali mahzarında ikrâr ve takrîr-i kelâm edip vilâyet-i Anadolu’da Alâiye sancağında İbradi kasabası sınırında vâki‘ bir tarafı Bar İmâmı oğlu Mehmed mülkü ve bir tarafı Sani Çelebi mülkü ve bir tarafı Kara Hacı Ali mülkü ve bir tarafı Abdi Bey mezra‘ası ile mahdûd olup yine mezbûr Mehmed Beşe’den bâtten iştirâ eylediğim mülk bağımı târîh-i kitâbdan her sene tamamına değin tımarından mâ‘adâ yılda üçer yüz akçe ücret-i müeccele ile mezbûr Mehmed Beşe’ye îcâr eyledim, ol dahi minvâl-i muharrer üzere istîcâr ve kabûl eyledi dedikde mukırr-ı merkūm el-Hâc Mehmed’i ikrâr-ı meşrûhunda el-mukarru lehü’l-merkūm Mehmed Beşe vicâhen tasdîk ve hudûd-ı mezkûr ile mahdûd olan bağı mezbûr el-Hâc Mehmed’e tımarından mâ‘adâ yılda üçer yüz akçe ücret-i müeccele ile istîcâr eylediğini şifâhen tahkīk etmeğin mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’r-râbi‘ aşer min-Zilhicceti’ş-şerîfe li-sene selâse ve sittin ve elf. Şuhûdü’l-hâl: Es-Seyyid Mehmed Çelebi b. es-Seyyid Mehmed, es-Seyyid Nurullah Çelebi b. eş-Şerîfü’l-mezbûr, İbrahim Çelebi b. el-Hâc Ahmed, el-Hâc Mustafa b. el-Hâc Ahmed, el-Hâc Mustafa b. Ömer, Ömer b. Ahmed, Yahya Beşe b. Mehmed, İbrahim Çelebi b. Davud, Hüseyin Beşe b. Hasan ve gayruhum mine’l-huzzâr.