Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 137 Hüküm no: 150 Orijinal metin no: [23b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin bağ ve tarlasını el-Hâc Mehmed’e sattığı Vilâyet-i Anadolu’da Alâiye sancağında İbradi kasabasında sâkin olan Mehmed Beşe b. el-Hâc Ali mahfil-i kazâda işbu râfi‘u’l-kitâb Bursa’da Veled-i Harîr Mahallesi’nde sâkin el-Hâc Mehmed b. el-Hâc Hüseyin mahzarında ikrâr ve takrîr-i kelâm edip kasaba-i mezbûr sınırında vâki‘ bir tarafı Bar İmâmı oğlu Mehmed mülkü ve bir tarafı Sani Çelebi mülkü ve bir tarafı Kara Hacı Ali mülkü ve bir tarafı Abdi Bey mezra‘ası ile mahdûd bir kıt‘a mülk bağımı cümle tevâbi‘ ve levâhıkı ile iki yüz elli kıt‘a riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr el-Hâc Mehmed’e bey‘ edip ol dahi minvâl-i muharrer üzere iştirâ ve kabûl eyleyip ve yine kasaba-i mezbûre sınırında Aşağıyazı nâm mevzi‘de vâki‘ etrâf-ı selâsesi Kādızâde el-Hâc Mehmed mezra‘ası ve bir tarafı mezbûr Abdi Bey mezra‘ası ile mahdûd bir kıt‘a tarlamın dahi hakk-ı tasarrufunu sâhib-i arz ma‘rifetiyle elli kıt‘a mezbûru’n-na‘t guruş bedel mukābelesinde mezbûr el-Hâc Mehmed’e tefvîz edip ol dahi vech-i meşrûh üzere tefevvüz ve kabûl eyledikden sonra semen-i mezbûr iki yüz elli riyâl ile bedel-i merkūm elli riyâlden müctemi‘ olan üç yüz kıt‘a riyâlî guruş-ı kebîri merkūm el-Hâc Mehmed’den bi’t-tamam ahz u kabz edip meblağ-ı mezkûru ve mezra‘a-i mersûmeyi mahallinde kabz ve tesellüm ve zabt ve tasarrufa taslît eyledim dedikde gıbbe’t-tasdîk ve’t-taleb mâ-vaka‘a ketb ü sebt olundu. Fi’l-yevmi’s-sâlis aşer min-Zilhicceti’ş-şerîfe sene selâse ve sittin ve elf. Şuhûdü’s-sâbıkūn.