Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 138 Hüküm no: 152 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın içinde değirmen ve ağaçlar olan tarlasını istiğlal yoluyla Yeğenzâde Mahmud Efendi Vakfı’na sattığı Mahmiye-i İstanbul’da Gül Câmi‘-i şerîfi Mahallesi’nde sâkin mefharü’l-akrân Mustafa Ağa b. İbrahim mahfil-i kazâda mahmiye-i mezbûrede bi’l-fi‘il Sebzehâne-i âmire kâtibi olan Yeğenzâde Mahmud Efendi Vakfı’na bi’l-fi‘il mütevellî olan işbu hâmilü’l-vesîka mefharü’l-eşbâh Muzaffer Ağa b. Abdullah mahzarında ikrâr-ı tâm ve takrîr-i kelâm edip işbu akdin sudûruna değin silk-i mülk-i sahîhinde münselik olup Kuşadası’nda Akçaabad hâssı toprağında vâki‘ Dumanderesi nâm nehir sel suyu ile dâir bana intimâ ile tahdîd ve tavsîfden müstağnî iki göz değirmen ve içinde iki göz çatma anbar ve kurbünde bir ahırımı ve zikr olan değirmen kurbünde vâki‘ bir tarafı değirmen harkı olan arsa ve bir tarafı değirmi dereke tâ‘bir olunur nehir ve bir tarafı kendi tarlam ve bir tarafı Hoca Ali Vakfı ile mahdûd eşcâr-ı müsmireyi ve müte‘addid kavak ağaçlarımı muhtevî hadîkayı ve hadîka-i mezbûre kurbünde vâki‘ ma‘lûmü’l-hudûd bir kıt‘a mülk yoncalığımı cümle tevâbi‘ ve levâhıkı ile bi-safkatin vâhidetin mütevellî-i mezkûr Muzaffer Ağa’ya tammü’l-vezn ve sahîhü’l-ayâr sekiz yüz kıt‘a riyâlî guruş-ı kebîr ki tekîden li’n-nısfı dört yüz guruş eder târîh-i kitâb senesi Şevvâli’l-mükerrem gurresinde bey‘ edip ol dahi mâl-ı vakfı mezbûr ile bi-tarîkı’l-istiğlâl iştirâ ve kabûl edip kabz-ı semen ve tesellüm eyledikden sonra emlâk-i mezbûre mütevellî-i merkūmdan yine târîh-i mezbûrdan bir sene tamam[ına] değin yüz yirmi kıt‘a mezbûru’n-na‘t riyâli guruş ücret-i müeccel ile istîcâr eyledim, ol dahi îcâr ve tesellüm eyledi dedikde gıbbe’t-tasdîk ve’t-taleb mâ-vaka‘a ketb ü sebt olundu. Fi’l-yevmi’s-selâse aşer min-Zilhicceti’ş-şerîfe sene selâse ve sittin ve elf. Şuhûdü’l-hâl: Zülfikār Bey b. Hasan, Müstedam b. Abdullah, Mustafa Bey er-Ressâm, Mahmud Beşe er-Râcil, İbrahim Bey, Ali b. Hamza, Rıdvan b. Abdullah, el-Hâc Hüsrev [b.] Abdullah, Mehmed b. Abdullah, Hüseyin Çavuş ve gayruhum mine’l-huzzâr.