Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 138 Hüküm no: 153 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsa Bali’nin Mehmed Beşe’ye olan borcunun bir kısmını ödediği, geri kalanı da ödemeyi taahhüd ettiği Vilâyet-i Anadolu’da Aydıncık kazâsına tâbi‘ Sazlıdere nâm karye ahâlîsinden İsa Bali b. Musa nâm kimesne mahfil-i kazâda işbu bâ‘isü’l-kitâb Mehmed Beşe b. Musa mahzarında ikrâr ve takrîr-i kelâm edip mezbûr Mehmed Beşe târîh-i kitâb senesi Ramazan-ı şerîfde otuz altı bin nakd râyic fi’l-vakt fıddî akçe bana îdâ‘ ve teslîm edip ben dahi meblağ-ı mezbûr otuz altı bin akçeyi istîdâ‘ ve tesellüm eylediğimden sonra meblağ-ı mezbûru kendi mesârifime sarf etmekle meblağ-ı mezbûru şer‘le bana tazmîn ettirilmek lâzım gelmeğin hâlâ mezbûr Mehmed Beşe’ye on bin yüz yirmi akçe teslîm edip ol dahi kabz ve tesellüm eyledikden sonra bâkī yirmi beş bin sekiz yüz seksen akçeden beş bin sekiz yüz seksen akçesini târîh-i kitâbdan on gün tamamına değin mezbûr Mehmed Beşe’nin âdemîsi Osman Beşe b. Mehmed ve yirmi bin akçesini dahi yüz seksen gün tamamına değin mezbûr Mehmed Beşe’nin kendisine edâya müte‘ahhid oldum dedikde gıbbe’t-tasdîk ve’t-taleb mâ-vaka‘a ketb ü sebt olundu. Fi’l-yevmi’s-sâlis aşer min-Zilhicceti’ş-şerîfe sene selâse ve sittin ve elf. Şuhûdü’l-hâl: Mefharü’l-kudât Hasan Efendi, el-Hâc Receb b. Hızır, Ömer Beşe b. Mehmed, Ömer Beşe b. Veli, Receb Beşe b. Hızır, Receb Beşe b. Hasan, el-Hâc Mustafa b. Yusuf, İbrahim Çelebi b. Davud, Hasan Beşe b. Hüseyin.