Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 139 Hüküm no: 154 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şemail v. Mosi’nin cariye bedelinden borcu olduğu Tüccârdan Mehmed b. Emrada nâm kimesne mahfil-i şer‘-i şerîfde Yahû[d] tâifesinden işbu sâhibü’r-rakīm Şemail v. Mosi muvâcehesinde üzerine da‘vâ edip mezbûr Şemail zimmetinde evsâfı beynimizde ma‘lûme bir câriye bahâsından yüz kırk riyâlî guruş hakkım olup meblağ-ı mezbûrdan yüz yirmi beş guruşunu ahz u istîfâ edip bâkī on beş guruş hakkımı vermede ta‘allül etmeğin suâl olunup alıverilmesi murâdımdır dedikde gıbbe’l-istintak mezbûr Şemail cevâbında fi’l-hakīka vech-i muharrer üzere müdde‘î-i mezbûra <> bir câriye bahâsından yüz kırk guruş deynim olup lâkin meblağ-ı mezbûrdan yüz yirmi beş guruşunu def‘ ve teslîm edip bâkī on beş guruşdan zimmetini ibrâ ve ıskāt eylemişdir dedikde gıbbe’t-tasdîk ve’l-inkâr ve’l-istişhâd udûl ve sikātdan Ahmed Bey b. Abdullah el-cündî ve İbrahim Bey b. Abdullah el-cündî li-ecli’ş-şehâde hâzırân olup fi’l-hakīka müdde‘î-i mezbûr Mehmed bizim huzûrumuzda mezbûr Şemail zimmetinde bir câriye bahâsından olan yüz kırk riyâlî guruş hakkının yüz yirmi beş guruşunu ahz ve istîfâ edip mâ‘adâ on beş guruşdan zimmetini ibrâ ve ıskāt eyledim bu husûsa şâhidleriz şehâdet dahi ederiz deyü herbiri edâ-yı şehâdet-i şer‘iyye eylediklerinde [24b] şehâdetleri hayyiz-i kabûle vusûl bulmağın mûcebiyle müdde‘î-i mezbûr bilâ-beyyine ta‘arruzdan men‘ olundu, mâ-vaka‘a bi’t-taleb sebt ü ketb olundu. Fi’l-yevmi’s-selâse aşer min-Zilhicceti’ş-şerîfe li-sene selâse ve sittin ve elf. Şuhûdü’l-hâl: Hasan Beşe b. Hasan, İbrahim Çelebi b. Davud, Resül Beşe b. Hüseyin, Mehmed Çelebi b. Hüseyin, Mehmed b. Abdullah el-muhzır.