Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 140 Hüküm no: 155 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Beşe’nin vârislerinden Mustafa b. Bali’nin hissesini alarak davadan vazgeçtiği Vilâyet-i Anadolu’da Zeytun kazâsına tâbi‘ Kozca nâm karye ahâlîsinden olup mahmiye-i İstanbul’da Elvanzâde Mahallesi’nde mütemekkin iken bundan akdem müteveffâ olan Abdullah Beşe b. Bahtiyar’ın verâseti sulbiye sagīre kızı Meryem ile usûbet-i nesebiye cihetinden vârisleri olan ibn-i ammileri Mustafa Çelebi b. Ali Efendi ve Süleyman b. Kasım ve diğer Mustafa b. Bali[ye] münhasıra olup mezbûr Mustafa b. Bali tarafından müteveffâ-i mezbûrun muhallefâtından bi-hasebi’l-irsi’ş-şer‘î kendüye intikāl eden hisse-i şer‘iyyesini muhallefât-ı mezbûreye vâzı‘u’l-yed olup sagīr-i mezbûrenin vasiyy-i muhtârı olan Ahmed b. Mustafa’dan taleb ve da‘vâ ve sulh ve ibrâ ve ahz u kabz ve îsâl ve kabz ve îsâle mütevakkıf olduğu umûrun cümlesine vekîl olup vekâleti hâlâ Zeytun kazâsında hilâfeten müvellâ olan Hızır Efendi b. Ali kıbelinden vârid imzâ ve hatemiyle mümzâ ve mahtûm târîh-i kitâb senesi Zilka‘desi’nin evâsıtı târîhiyle müverreha olan nakl-i şer‘î zeylinde beyne şuhûdi’t-tarîk isimleri mastûr olan Mehmed Bey b. Mustafa el-cündî ve diğer Mehmed Bey b. Ahmed şehâdetleri [ile] sâbite olan Ömer b. Mehmed mahfil-i şer‘-i hatîr-i lâzımü’t-tevkīrde muhallefât-ı müteveffâ-i mezbûra vâzı‘u’l-yed olan sagīre-i mezbûre Meryem’in vasiyy-i muhtârı olan işbu sâhibü’r-rakīm mezbûr Ahmed muvâcehesinde bi’l-vekâle ikrâr u i‘tirâf edip müteveffâ-i mezbûrun terekesinin bi-hasebi’l-irsi’ş-şer‘î nısfı kızı mezbûr Meryem’e ve nısf-ı bâkī mezbûrûn Süleyman ve Mustafa Çelebi ve diğer Mustafa’ya intikāl edip vech-i muharrer üzere müvekkil-i mezbûr diğer Mustafa’ya hisse-i şer‘iyyesi içün vasiyy-i mezbûr yedinden bi-tarîkı’s-sulh beş bin akçeyi ahz u kabz edip muhallefât-ı mezbûreye müte‘allik âmme-i da‘vâdan mezbûru ibrâ ve ıskāt eyledim, ba‘de’l-yevm mazmûn-ı kitâba muhâlif da‘vâ sudûr ederse lede’l-hükkâmi’l-kirâm istimâ‘ olunmaya dedikde vekîl-i mezbûru vech-i muharrer üzere cârî olan ikrârın bi’l-muvâcehe tasdîk etmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene selâse ve sittin ve elf. Şuhûdü’l-hâl: Mehmed Dede b. Hasan, el-Hâc Yusuf b. Abdullah, el-Hâc İsmail b. Rıdvan, el-Hâc Mustafa b. Şa‘ban.