Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 140 Hüküm no: 156 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aşçı Mustafa Bey’in mirasından olan bir cariyenin satıldığı Mahmiye-i İstanbul’da İbrahim Paşa Mahallesi’nde sâkin olup bundan akdem vefât eden merhûm Aşcı Mustafa Bey b. Abdullah nâm müteveffânın sulbî kebîr oğlu Hüseyin Çelebi asâleten ve sulbiye kebîre kızı Ümmühani tarafından husûs-ı âti’z-zikre vekâleti hasm-ı câhid-i şer‘î mahzarında mezbûreyi ma‘rifet-i şer‘iyye ile ârifân olan Mustafa b. Hasan ve Receb Beşe b. Mahmud şehâdetleri ile şer‘an sâbite olmağın vekâleti ve yine müteveffâ-i mezbûrun sulbiye kebîre kızı Âişe tarafından dahi şâhidân-ı mezbûrân şehâdetleri ile hasm-ı münkir mahzarında vekâleti sâbite olan zevci Hüseyin b. Abdullah vekâleten mahfil-i kazâda işbu râfi‘u’l-kitâb Ahmed Çelebi b. Mehmed mahzarında herbiri ikrâr ve takrîr-i kelâm edip mûrisimiz müteveffâ-i mezbûrun muhallefâtından olup evsâfı beynimizde ilm-i şer‘î ile ma‘lûm Rusiyyetü’l-asl Ceyhun nâm câriyeyi merkūm Ahmed Çelebi’ye on sekiz bin nakd râyic fi’l-vakt fıddî akçeye bâtten bey‘ ve teslîm edip ol dahi minvâl-i muharrer üzere iştirâ ve tesellüm eyledikden sonra semeni olan meblağ-ı mezbûru müteveffâ-i merkūmdan hâl-i sıhhatinde mezbûr Ahmed Çelebi’ye deyni olan on sekiz bin akçeye takās eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fî-yevmi’r-râbi‘ aşer min-Zilka‘deti’ş-şerîfe sene selâse ve sittin ve elf. Şuhûdü’l-hâl: Mehmed Çelebi b. el-Hâc Mahmud, Ahmed Çelebi b. Hasan, Mehmed b. Nurullah, el-Hâc Hüseyin b. Kemal, Mehmed Çelebi b. el-Hâc Yusuf, Usta Nebî b. Mehmed, Mahmud Beşe b. Ali, Usta Musa, Abdülkerim b. Mehmed, Halil Beşe b. Ali, Usta Musa b. İbrahim, Hasan Çelebi b. Kanber, İbrahim b. Davud.