Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 141 Hüküm no: 157 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Beşe ile Savaris arasındaki buğday alış-verişi davasındaki anlaşmazlığa sulh bedeli karşılığında son verildiği Vilâyet-i Anadolu’da Rize kasabasında İmade Mahallesi’nde sâkin Ömer Beşe b. Mehmed nâm râcil meclis-i şer‘-i hatîr-i lâzımü’t-tevkīrde Mahrûse-i Galata muzâfâtından İstinye nâhiyesine tâbi‘ Tarabya nâm karye zimmîlerinden sâhib-i hâze’r-rakīm Savaris v. Aknadi nâm zimmî muvâcehesinde ikrâr-ı tâm ve takrîr-i kelâm edip mezbûr Savaris’e buğday iştirâ edivermek üzere yedine râyicen on bin akçe def‘ ve teslîm etmiş idim, iştirâ ediverme[me]ğin [25a] meblağ-ı merkūmu taleb ettiğimde edâ ve îfâda ta‘allül ve terâhî etmek ile beynimizde münâza‘ât-ı kesîre ve muhâsamât-ı şedîde vâki‘ olmuş idi. El-hâletü hâzihî aramıza muslihûn tavassut edip meblağ-ı merkūmdan beni mezbûr Savaris ile altı bin beş yüz râyicen fi’l-vakt akçe üzerine an-ikrâr sulh ettiklerinde ben dahi sulh-i mezbûru kabûl ve bedel-i sulh üzere meblağ-ı merkūm altı bin beş yüz akçeden zimmetini ibrâ-yı âmm-ı kātı‘u’n-nizâ‘ ile ibrâ ve ıskāt eyledim, min-ba‘d mezbûr Savarisi ile husûs-ı merkūma müte‘allika da‘vâ ve nizâ‘ım ve alâka ve medhalim kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb ü sebt olundu. Tahrîren fi’l-yevmi hâmis aşer min-Zilhicceti’ş-şerîfe sene selâse ve sittî ve elf. Şuhûdü’l-hâl: Ali Bey b. Süleyman, Mehmed Beşe b. Osman, el-Hâc Rıdvan b. Abdullah, Yusuf Beşe b. Abdullah, İbrahim Çelebi b. Davud, Siyavuş Beşe b. Hüseyin, Hüseyin Beşe b. Hasan.