Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 142 Hüküm no: 159 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu esnafından Yani v. Panayot’un gemi reislerinden Mehmed b. Mustafa’ya borcu olduğu Sefîne reislerinden işbu bâ‘isü’l-kitâb Mehmed b. Mustafa nâm kimesne meclis-i şer‘-i hatîr-i lâzımü’t-tevkīrde uncu tâifesinden Yani v. Panayot nâm zimmî muvâcehesinde üzerine da‘vâ edip mezbûr Yani vilâyet-i Rumeli’nde İsmail iskelesinden mahmiye-i İstanbul’a nakl içün her keyli on ikişer akçe hesâbınca iki bin üç yüz on iki keyl buğdayı yirmi yedi bin yedi yüz kırk dört akçe navul ile sefîneye tahmîl eylemiş idim ve yine her keyli kırk beşer akçeye olmak üzere yedimden müşterâ ve makbûz on sekiz keyl buğday bahâsından dahi zimmetinde sekiz yüz on akçe ki cem‘an yirmi sekiz bin beş yüz elli dört akçe hakkım olup meblağ-ı mezbûrdan yirmi bir bin yedi yüz akçesini ahz u kabz edip zimmetinde bâkī kalan altı bin sekiz yüz elli dört akçe hakkımı taleb ederim suâl olunsun dedikde gıbbe’s-suâl mezbûr Yani cevâbında fi’l-vâki‘ müdde‘î-i mezbûra zikr olunan buğday navlunundan ve iştirâ eylediğim buğday bahâsından yirmi sekiz bin beş yüz elli dört akçe deynim olup lâkin meblağ-ı mezbûru kendüye bi’t-tamam def‘ ve teslîm eyledim deyicek gıbbe’l-inkâr mezbûr Yani’den beyyine taleb olundukda ikāmet-i beyyineden ızhâr-ı acz ile istihlâf etmeğin mezbûr Mehmed’e mersûm Yani’den yirmi bir bin yedi yüz akçe ziyâde ahz u kabz etmediğine yemîn teklîf olundukda ol dahi hesebi’l-mesûl yemîn bi’llâhi te‘âlâ etmeğin mûcebiyle meblağ-ı bâkī altı bin sekiz yüz elli dört akçeyi müdde‘î-i merkūma def‘ ve teslîm etmek üzere mezbûr Yani’ye tenbîh olunup mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilhicceti’ş-şerîfe li-sene selâse ve sittin ve elf. Şuhûdü’l-hâl: İbrahim Çelebi b. Davud, Hasan Çelebi b. Kanber, Rıdvan Beşe b. Abdullah, Muharrem Beşe b. Abdullah ve gayruhum mine’l-huzzâr.