Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 144 Hüküm no: 162 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un evini Mustafa Ağa’ya sattığı Husûs-ı âti’l-beyânın mahallinde tahrîr olunması iltimâs olunmağın savb-ı şer‘den mevlânâ Abdulkādir Efendi irsâl olunup ol dahi zeyl-i kitâbda mastûrü’l-esâmî olan Müslimîn ile mahmiye-i İstanbul’da Gül Câmi‘-i şerîfi Mahallesi’nde sâkin fahrü’l-ekâbir ve’l-a‘yân Mustafa Ağa b. Abdullah’ın menziline varıp akd-i meclis-i şer‘-i şerîf eylediklerinde yine mahalle-i mezbûrede sâkine Âişe bt. Dilaver nâm hatun meclis-i mezbûrda işbu râfi‘u’l-kitâb mûmâ-ileyh Mustafa Ağa mahzarında ikrâr u i‘tirâf edip müstakillen silk-i mülkümde muntazam olup zikrolunan mahallede vâki‘ iki tarafı mezbûr Mustafa Ağa mülkü ve bir tarafı merhûm Sirkeci Emir Efendi Vakfı ve bir tarafı tarîk-i hâs ile mahdûd iki bâb tahtânî ve iki bâb fevkānî odaları ve kenîfi ve muhavvatayı müştemil olan menzilimi cemî‘-i levâhıkı ve kâffe-i menâfi‘ ve merâfıkı ile elli bin nakd râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile Mustafa Ağa’ya bey‘ ve teslîm edip ol dahi minvâl-i muharrer üzere iştirâ ve tesellüm eyledikden sonra semeni olan meblağ-ı mezbûr elli bin akçeyi yedinden bi’t-tamam ve’l-kemâl ahz u kabz eyledim, ba‘de’l-yevm menzil-i mezbûr mûmâ-ileyh Mustafa Ağa’nın mülk-i müşterâsı olmuşdur, keyfe mâ yeşâ’ ve yehtâr mutasarrıf olsun dedikde gıbbe’t-tasdîk mezbûre Âişe’nin vâlidesi Üftâde bt. Abdullah nâm hatun dahi menzil-i mezbûr kızım merkūme Âişe’ye babası zevcim mezbûr Dilaver’den irs-i şer‘le müstakillen intikāl eyledi, ben hissemi ve mihrimi sâir muhallefâtından kabz eyledim, cidden benim alâka ve medhalim ve menzil-i mezbûra müte‘allik vechen mine’l-vücûh da‘vâ ve nizâ‘ım yokdur deyicek vâki‘ hâli mevlânâ-yı mezbûr mahallinde tahrîr ba‘dehû gelip meclis-i şer‘de vukū‘u üzere inhâ ve takrîr etmeğin mâ-vaka‘a gıbbe’t-taleb ketb ü sebt olundu. Fi’l-yevmi’t-tâsi‘ aşer min-Zilhicceti’ş-şerîfe li-sene selâse ve sittin ve elf. Şuhûdü’l-hâl: Mehmed Efendi b. Mehmed el-İmâm, Süleyman Efendi el-imâm, Ahmed Çelebi el-müezzin, Mehmed Çelebi el-müezzin, Miftâhî Ahmed Çelebi, el-Hâc Ali Çelebi b. Mehmed.