Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 144 Hüküm no: 163 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın evini Ayşe Hatun’a sattığı Husûs-ı âti’l-beyânın mahallinde tahrîr olunması iltimâs olunmağın savb-ı şer‘-i şerîfde mevlânâ Abdulkādir Efendi irsâl olunup ol dahi zeyl-i kitâbda mastûrü’l-esâmî olan Müslimîn ile mahmiye-i İstanbul’da Gül Câmi‘-i şerîfi Mahallesi’nde sâkin fahrü’l-akrân Mustafa Ağa b. Abdullah’ın menziline varıp akd-i meclis-i şer‘-i şerîf eylediklerinde mûmâ-ileyh Mustafa Ağa meclis-i mezbûrda işbu râfi‘atü’l-kitâb Âişe Hatun bt. Dilaver mahzarında ikrâr u i‘tirâf edip silk-i mülkümde muntazam olup zikrolunan mahallede vâki‘ iki tarafı kendi mülküm ve bir tarafı tarîk-i âm ve bir tarafı tarîk-i hâs ile mahdûd üç bâb fevkānî odaları ve dehlîzi ve iki bâb tahtânî odaları ve kenîfi ve muhavvatayı müştemil menzilimi cümle tevâbi‘ ve levâhıkı ve kâffe-i menâfi‘ ve merâfıkı ile altmış bin nakd râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Âişe Hatun’a bey‘ ve teslîm edip ol dahi minvâl-i muharrer üzere iştirâ ve tesellüm eyledikden sonra semeni olan meblağ-ı mezbûr altmış bin akçeyi yedinden tamamen ahz u kabz eyledim, menzil-i mezbûrda benim alâka ve medhalim kalmayıp mezbûre Âişe Hatun’un mülk-i müşterâsı olmuşdur, keyfe mâ teşâ’ ve tehtâr mutasarrıfe olsun dedikde gıbbe’t-tasdîkı’l-mu‘teber vâki‘ hâli mevlânâ-yı mezbûr mahallinde tahrîr ve ba‘dehû meclis-i şer‘a gelip vukū‘u üzere inhâ ve takrîr etmeğin mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’t-tâsi‘ aşer min-Zilhicceti’ş-şerîfe li-sene selâse ve sittin ve elf. Şuhûdü’l-hâl: Mehmed Efendi b. Mehmed el-imâm, Süleyman Efendi el-imâm, Ahmed Çelebi el-müezzin, Mehmed Çelebi el-müezzin, Miftâhî Ahmed Çelebi ve gayruhum mine’l-huzzâr.