Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 145 Hüküm no: 164 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Bey’in bostancıların ihtiyacı için vakfedilmiş olan paradan almış olduğu borcu ödemesi Hadâik-ı sultâniyeden hâsbahçede bekâr odasında olan bostancıyânın mühimmât-ı lâzımelerine mevkūfe olan nukūda meşrûtiyet üzere bi’l-fi‘il mütevellî olan tâife-i mezbûreden işbu bâ‘isü’l-kitâb Receb Bey b. Osman ve İbrahim Bey b. Mustafa mahfil-i kazâda Hüseyin Bey b. Mustafa mahzarında takrîr-i da‘vâ ve takrîr-i kelâm edip zikrolunan odanın nukūd-ı mevkūfesinden bin altmış iki Cumâdelûlâsı’nda iki yüz kıt‘a riyâlî guruş ikrâz ve teslîm edip ol dahi iktirâz ve tesellüm eylemişdi. Ba‘dehû mezbûr Mustafa Bey yüz altmış guruş asl-ı mâldan ve kırk guruş beher sene mukābele-i şer‘iyyesinden cânib-i vakfa edâ edip asl-ı mâl-ı mezkûrdan kırk guruş zimmetinde bâkī kalmışdır, suâl olunup cânib-i vakıf için alıverilmek matlûbumdur dediklerinde gıbbe’s-suâl mezbûr Mustafa Bey kaziyye minvâl-i muharrer üzere olduğunu ikrâr edip lâkin meblağ-ı mezbûrun onu on bir buçuk hesâbı üzere mukābelesi otuz guruş eder on guruş ziyâde teslîm vardır, ol ziyâde olunan on guruşu asl-ı mâla hesâb ederim, bu takdîrce zimmetimde otuz guruş kalmışdır deyicek fi’l-hakīka onu bir buçukdan ziyâde murâbaha câiz olmamağla meblağ-ı mezbûr on guruş dahi asla zammolunup bâkī kalan otuz guruşu cânib-i vakıf için müdde‘iyân-ı mezbûrâna edâ etmek üzere merkūm Mustafa Bey’e tenbîh-birle mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Zilhicceti’ş-şerîfe li-sene selâse ve sittin ve elf. Şuhûdü’l-hâl: Hasan Çelebi b. Kanber, İbrahim b. Davud, Pîrî b. Hüseyin, Derviş b. ( ) el-muhzır, Rıdvan b. Abdullah.