Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 146 Hüküm no: 165 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçu Manol’ün İstanbul patriğinde olan alacağını tahsil ettiği Tüccârdan olup mahmiye-i İstanbul’da Kaliçeciler hanında sâkin olan Haçu Manol v. Dimo nâm zimmî mahfil-i kazâda bi’l-fi‘il bostancılar kethüdâsı olan mefharü’l-emâcid ve’l-ekârim Hasan Ağa -zîde kadruhu- tarafından ikrâr-ı âti’l-beyânı tasdîka vekîl-i şer‘îsi olan İsmail Bey b. Hüseyin el-Bostanî mahzarında ikrâr u i‘tirâf edip hâlâ mahmiye-i İstanbul patriği zimmetinde cihet-i şer‘iyyeden bin elli kıt‘a riyâlî guruş hakkım olup meblağ-ı mezbûru patrik-i mezbûrdan ahz u kabz ve bana îsâle müvekkil-i mûmâ-ileyhi tarafımdan vekîl ve nâib-i menâb nasb ü ta‘yîn edip mûmâ-ileyh vekâlet-i mezbûreyi kabûl ve merâsimini edâya müt‘ahhid olmuş idi. El-hâletü hâzihî müvekkil-i mûmâ-ileyhin patrik-i mezbûrdan vekâlet hasebiyle kabz eylediği meblağ-ı mârru’z--zikr bin elli riyâlî guruşu dahi müvekkil-i mûmâ-ileyh Hasan Ağa -zîde kadruhu- yedinden bi’t-tamam ve’l-kemâl ahz u kabz eyledim, zikrolunan bin elli riyâlî guruş hakkımdan mûmâ-ileyh Hasan Ağa -zîde kadruhu- yedinde bir akçe ve bir habbe hakkım kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’t-târîhi’l-mezbûr. Şuhûdü’l-hâl: Hasan Bey b. ( ) ser-tabbâhîn, Ebûbekir Bey el-bostânî, İbrahim Halîfe el-bostânî, Salih Bey çukadâr.