Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 149 Hüküm no: 169 Orijinal metin no: [26b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâkimin İbrahim Çelebi adlı küçüğe takdir ettiği nafakayı artırdığı Medîne-i mahmiye-i Galata mahallâtından Yolcuoğlu Mahallesi’nde sâkin iken fevt olan merhûm Kara Mehmed’in İbrahim Çelebi nâm sagīr oğlunun nafakası, kisvesi ve sâir havâic-i zarûriyesi için bundan akdem farz ve takdîr olunan yevmî yirmi akçenin adem-i vefâsı, isimleri zeyl-i kitâbda mastûr sikātın haber vermeleriyle hâkim-i muvakki‘ a‘lâhu el-mütevakkı‘ rızâ-i mevlâhu indinde ma‘lûm olmakla hâkim-i mûma-ileyh -esbaga’llâhu ni‘amehû aleyh-, hacr ve terbiyesi altında bulunduğu el-Hâc Hasan b. İbrahim’in talebiyle, müteveffâ-i mezbûr babasından intikāl eden ziyâdeye vâfî mâlından alınmak üzere nafaka-i mukaddere-i mezbûreyi zeyl-i kitâbda mezkûr târîhden itibaren yevmî on üç akçe artırarak cem’an yevmî otuz üç akçe nafaka farz ve takdîr etti ve meblağ-ı mefrûzu sagīr-i mezkûrun havâicine sarf etmeye ve vakt-i zarûretde istidâne edip vakt-i zaferde rücû‘ etmeye mezbûr el-Hâc Hasan’a izin verdi. Cerâ zâlike ve hurrire fi’l-yevmi’r-râbi‘ ve’l-ışrîn min-Zilhicceti’ş-şerîfe li-sene selâse ve sittin ve elf. Şuhûdü’l-hâl: el-Hâc Osman Pazarbaşı sâbıkā , Himmet Beşe b. Ahmed er-râcil, Hüseyin bölükbaşı en-nâzır, el-Hâc Hasan, el-Hâc Murtaza b. Mahmud, Abdülcelil b. Ahmed, Himmet Beşe b. Şa‘bân, Mehmed b. Hasan, Hasan Çelebi b. Kanber, İbrahim Çelebi b. Davud, Hüseyin Beşe b. Hasan ve gayruhum mine’l-huzzâr